Qostanaı oblysy: Amanqaraǵaı jáne Ozernoe aýyldaryndaǵy órt oqshaýlandy

NUR-SULTAN. QazAqparat - Amanqaraǵaı jáne Ozernoe aýyldaryndaǵy órtter oqshaýlandy, qazirgi ýaqytta jeke oshaqtardy sóndirý jumystary júrgizilýde, dep habarlaıdy QR Tótenshe jaǵdaılar mınıstrliginiń jedel shtaby.

«Amanqaraǵaı aýylyndaǵy (ákimshilik ǵımarat) jáne Lesnoe aýylyndaǵy munaı bazasynyń aýmaǵyndaǵy órtter sóndirildi. Ot benzın tıelgen rezervýarlar men dızel otyndaryna tıgen joq.

Amanqaraǵaı jáne Ozernoe aýyldaryndaǵy órtter oqshaýlandy, qazirgi ýaqytta jeke oshaqtardy sóndirý jumystary júrgizilýde.

Turǵyndar men órt sóndirýge qatysýshylar arasynda adam shyǵyny tirkelgen joq» delingen habarlamada.

Málimetke saı, 10 adam (5 adamy, bir kámeletke tolmaǵan adamdy qosa alǵanda, 1 orman sharýashylyǵynyń qyzmetkeri, 1 ákimdik qyzmetkeri, 3 TJM qyzmetkeri) jeńil jáne ortasha aýyrlyqtaǵy jaraqat, kúıik alyp, ýlandy. Olardyń 4-eýi ortalyq aýdandyq aýrýhanada, 6 tekserýden keıin jáne kómek kórsetilgennen keıin úılerine jiberildi.

Jaǵdaıdyń jaqsarýyna baılanysty r-36 respýblıkalyq mańyzy bar avtojolyndaǵy qozǵalys jáne temir jol (poezdar) boıynsha poezdar qozǵalysy tolyq kólemde qaıta jandandy (№82, 43, 51, 37, 622 poezdar, barlyǵy-908 jolaýshy).

«Qazgıdromet» RMK derekteri boıynsha 4 qyrkúıekte Qostanaı oblysynyń Áýlıekól aýdanynda joǵary temperatýra 28 gradýsqa deıin, jeldiń jyldamdyǵy sekýndyna 9 metrge deıin saqtalady.