Qostanaı oblysy ákiminiń eki orynbasary qysqartyldy

QOSTANAI. QazAqparat – Qostanaı oblysy ákiminiń orynbasary, atap aıtqanda kólik ınfraqurylymy, qurylys, sáýlet jáne tabıǵı resýrstar salalaryna jetekshilik etken Vıktor Ionenko qyzmetinen ketti. Al, taǵy bir oblys ákimi orynbasarynyń orny mamyr aıynan beri bos turǵan, dep habarlaıdy QazAqparat tilshisi.

«Memleket basshysynyń tapsyrmasy boıynsha Qostanaı oblysy ákiminiń orynbasary Ionenko Vıktor Nıkolaevıch jáne oblys ákiminiń taǵy bir orynbasarynyń bos laýazymy qysqartyldy. Olardyń laýazymdyq mindetteri oblys ákiminiń qazirgi orynbasarlaryna bólinip júkteledi», - dep túsindirdi aımaq basshysynyń baspasóz qyzmetinen.

Buǵan deıin Qostanaı oblysy ákiminiń bes orynbasary bolǵan. Onyń ishinde qysqartylǵan Vıktor Ionenko men mamyr aıynda QR Prezıdenti Ákimshiliginiń ótinishterdi qaraýdy baqylaý bólimi meńgerýshisiniń orynbasary qyzmetine aýysqan Baqyt Esimova da bar.

Oblys ákiminiń birinshi orynbasary Ǵaýez Nurmuhambetov, orynbasarlary Erlan Spanov pen Arman Ábenov qyzmetterinde qaldy.