Qostanaı oblystyq kóliktik baqylaý ınspektsııasynyń basshysy ustaldy

NUR-SULTAN. QazAqparat – QR Sybaılas jemqorlyqqa qarsy is-qımyl agenttigi Aldyn alý departamentiniń basshysy Anar Jarova kóliktik baqylaý salasyndaǵy jemqorlyq táýekelder týraly aıtty, dep habarlaıdy QazAqparat tilshisi.

«Sybaılas jemqorlyq táýekelderine barynsha beıim salalardyń biri kóliktik baqylaý bolyp otyr. 2019 jyly kóliktik baqylaý ınspektsııasynyń 14 qyzmetkeri sottaldy. Kúni keshe ǵana Qostanaı oblystyq ınspektsııasynyń basshysy ustaldy. Ol júk kólik quraldarynyń júrip ótkeni úshin júıeli túrde para alý kúdigine ilikti», - dedi departament basshysy agenttikte ótken selektorlyq keńeste.

Onyń atap ótýinshe, mundaı faktiler Indýstrııa jáne ınfraqurylymdyq damý mınıstrligi tarapynan batyl sharalardy qolǵa alýy qajettigine dálel bola alady.

«Shema eski. Ol – bilikke ruqsat etilgen júktemeni asyryp, eńbek pen demalys rejimin saqtamaǵan júrgizýshilerdi beketten kedergisiz ótkizgeni úshin para alý. Sonyń saldarynan joldar buzylyp, Qazaqstannyń Qytaı men Eýropa arasyndaǵy kólik dálizi retindegi tartymdylyǵy quldyraıdy», - dedi ol.

Anar Jarovanyń aıtýynsha, baqylaý ınspektsııasynyń arnaıy monıtorıng toby 47 tekserý júrgizip, kólikterdiń artyq júk tıeýiniń 225 faktisin anyqtaǵan. Olardyń árqaısysy boıynsha ákimshilik hattama toltyryldy.