Qostanaı oblysynyń polıtsııasy 20 jyl kórispegen ákesi men qyzyn tabystyrdy

<p>ASTANA. KAZINFORM &mdash; Qostanaı oblysynyń polıtsııa qyzmetkerleri joǵalǵan adamdardy izdeýde jáne týystyq baılanystardy qaıta ornatýda joǵary kásibıligin kórsetti.</p>

Ótken jyly oblystyq polıtsııa departamentine týystarymen, ata-analarymen, baýyrlarymen nemese ápkelerimen baılanysyn joǵaltqandar týraly 110 ótinish kelip tústi. Jedel ári úılesimdi jumystyń nátıjesinde olardyń 85-i tabylyp, jaqyndarymen qaıta qaýyshty.

Adamdardyń joǵalýynyń basty sebepteri – baılanys úzilgendigi, turǵylyqty jeri týraly aqparattyń bolmaýy jáne týystar arasyndaǵy uzaq jyldyq túsinispeýshilikter men janjaldar. Máselen, 1995 jyly 58 jastaǵy Aleksandr Han Qazaqstannan belgisiz sebeptermen habarsyz ketken. Onyń qyzy ıÝlııa Han Qostanaı qalasynyń polıtsııa basqarmasyna júginip, joǵalǵan ákesin tabýǵa kómek surady.

Ákesin izdeý onyń ómir boıǵy armanyna aınalǵan. Aleksandr Hannyń 1995 jyly alys shetelge turaqty turýǵa ketip, otbasymen baılanysyn úzgenine qaramastan, polıtsııa qyzmetkerleri ıÝlııanyń úmitin úzbeı, izdeý jumystaryn bastady.

Kóshi-qon qyzmeti mamandarynyń kásibı jáne úılesimdi áreketteriniń arqasynda Aleksandr Hannyń Frantsııada uzaq jyldar boıy turǵany anyqtaldy. Ártúrli sebeptermen ol týystarymen baılanysyn jalǵastyra almaǵan, biraq qyzynyń tabandylyǵy men polıtseılerdiń eńbegi bul olqylyqtyń ornyn toltyrdy. Jıyrma jyldan keıin áke men qyz qaıta qaýyshyp, bul kezdesý Han otbasy úshin úlken qýanyshqa aınaldy.

Bul oqıǵa – úmittiń qanshalyqty mańyzdy ekenin jáne jaqsylyqqa senýdiń árdaıym óz jemisin beretinine jarqyn mysal. Polıtsııa qyzmetkerleriniń kásibı jumysy men adamgershilikke toly eńbegi nátıjesinde ajyraǵan týystyq baılanys qaıta ornap, otbasy óz jarasymyn tapty. Bul jaǵdaı otbasy qundylyqtaryn saqtaýda tártip saqshylarynyń jeke úlesiniń mańyzdylyǵyn taǵy bir ret dáleldedi.