Qostanaı oblysyndaǵy jantúrshigerlik jol apaty: úsh muǵalim qaza tapty

<p>QOSTANAI. KAZINFORM &ndash; Qostanaı oblysynyń Bilim basqarmasy jergilikti mektepterde jumys istegen pedagog mamandar qaza tapqanyn rastady, dep habarlaıdy Kazinform agenttiginiń tilshisi.</p>

16 jeltoqsanda bolǵan qaıǵyly oqıǵa úsh adamnyń ómirin qıdy. Olar – mektep muǵalimderi.

- 16 jeltoqsanda oblys aýmaǵynda bolǵan jol apatynan eki pedagog qaza tapqanyn ókinishpen habarlaımyz. Qostanaı aýdany Zarechnyı mektep-lıtseıiniń orys tili men ádebıeti pániniń muǵalimi, sondaı-aq Altynsarın aýdanynyń «Bolshe-Chýrakov» jalpy bilim beretin mektebiniń pedagog-psıhology týystaryna bara jatqan kezde «Qostanaı-Áýlıekól-Surǵan» tas jolynda apattan qaza tapty. Týystary men jaqyndaryna kóńil aıtamyz, - dep habarlady baspasóz qyzmeti.

Sondaı-aq, basqarma úshinshi pedagogtyń jeke mektepte jumys istegenin naqtylady.

Esterińizge sala keteıik, 16 jeltoqsan kúni Qostanaı oblysynda, Qarasý aýdany Gertseno kentinen 10 shaqyrym jerde, «Qostanaı-Áýlıekól-Surǵan» tasjolynda Volvo jáne Toyota Alphard avtomobıli qaqtyǵysyp, apat boldy. Jol apatynan jaraqat alǵan 3 adam oqıǵa ornynda kóz jumdy, taǵy úsheýi Áýlıekól aýdandyq aýrýhanasyna jatqyzyldy.