Qostanaı oblysyndaǵy aýylda sibir jarasy anyqtaldy

<p>ASTANA. KAZINFORM - Qostanaı oblysy Denısov aýdany Prırechnoe aýylynda sibir jarasy anyqtalýyna baılanysty karantın engizildi.</p>

Qostanaı oblysynyń veterınarııa basqarmasynyń habarlaýynsha, 26 shilde kúni Denısov aýdany, Sverdlov aýyldyq okrýgi Prırechnoe aýylyndaǵy jergilikti kásiporynda mal ólimi tirkelgeni týraly habarlama kelip túsken.

Patologııalyq materıal iriktelip, sibir jarasyn tekserý úshin Oblystyq veterınarııalyq zerthanaǵa jiberildi. 2024 jylǵy 31 shildedegi tekserý aktisine sáıkes, oblystyq veterınarııalyq zerthana bakterıologııalyq jáne PTR ádisimen sibir jarasyna iri qara maldan alynǵan patologııalyq materıalynyń saraptamalyq aktisi berildi.

— Sverdlov aýyldyq okrýgi ákiminiń 2 tamyzdaǵy qaýlysymen Prırechnoe aýylynyń aýmaǵynda karantın belgilendi. Respýblıkalyq epızootııaǵa qarsy jasaqtyń Qostanaı fılıaly ınfektsııa oshaǵynda oqshaýlaý jáne joıý sharalaryn júrgizý jumystary bastaldy, - delingen habarlamada.

Sibir jarasymen kúresý erejesine sáıkes karantın janýarlardyń sońǵy óliminen, ıaǵnı 15 kúnnen keıin, sondaı-aq zardap shekken aımaqta barlyq veterınarııalyq is-sharalar júrgizilgennen keıin joıylady.

Sońǵy bes kúnde iri qara maldyń ólimi tirkelgen joq, maldyń jalpy jaǵdaıy qanaǵattanarlyq, klınıkalyq belgileri baıqalǵan joq.