Qostanaı oblysynda tasqyn kezinde ıtterge arnalǵan panajaıdy sý basyp qaldy

<p>ASTANA. KAZINFORM — Qostanaı oblysynda ıtterge arnalǵan úlken aýmaqty bir-aq sátte sý basyp qaldy. Itter der kezinde bosatylyp úlgerdi. Qutqarý jumystary qalaı júrip jatqany týraly <a href="https://kaz.inform.kz/" target="_blank" rel="noopener">Kazinform</a> tilshisi janýarlarǵa qamqorlyq jasaıtyn baspana ıesi Lıýdmıla Berestovamen suhbatynda bildi.</p>

Itterge arnalǵan úıdiń qurylý tarıhy 2019 jyldan bastalǵan. Bastapqyda Lıýdmıla úı-jaı salý úshin qol jınap, qala ákimdigine júgingen.

Alaıda ákimdik bul maqsatqa bıýdjet qarastyrylmaǵanyn aıtty.

Sodan keıin Lıýdmıla ózi bastap qor tirkep, qarajat jınap, qurylysty bastaǵan.

— Sodan beri meniń ómirim túbegeıli ózgerdi — tamaqtanýǵa, uıyqtaýǵa, demalýǵa, otbasyma, dostaryma ýaqyt bolmady, búkil ómirimdi tastandy, múgedek, aýrý, álsiregen ıtterge qolaıly ómir súrý jaǵdaıyn jasaýǵa arnadym. Baspana ornalasqan ýchaske saıajaıdyń shetinde, qańyrap bos qalǵan úılerdiń arasynda, oıpatta ornalasqan. Biraq onda da narazylyq bildirgen kórshiler, ústimnen aryz jazýshylar kóp boldy. Elektr qýatyn óshirip tastak, jala jabý, memlekettik organdarǵa shaǵym túsirý syndy kóptegen kedergilerge keziktim. Odan keıin janýarlarǵa nemquraıly qaramaıtyn qala turǵyndarynyń qarjylaı qoldaýynyń arqasynda bıik betondy qorshaý turǵyzyldy. 1500 sharshy metr aýmaqqa 27 qorshaý salyndy. 2 vagon satyp aldyq, onyń biri veterınarlyq protsedýralarǵa arnalǵan, qajetti qosalqy qurylystar salyndy, aǵashtar otyrǵyzyldy, elektr jaryǵy tartyldy jáne aýyz sý alý úshin qudyq burǵylandy, — deıdi Lıýdmıla.

Qajyrly eńbekpen qurylǵan aýmaq 15 mınýttyń ishinde joıyldy. Erigen qar sýy barlyǵyn shaıyp ketti.

Foto L. Berestovanyń jeke muraǵatynan

— Meni úı-jaıdy sý alyp ketkeni emes, ıtterdiń qazirgi kúıi qatty alańdatady. Olardy birneshe adam izdep jatyr, — dedi Lıýdmıla.

Sý úı-jaıdy sanaýly mınýttarda-aq basyp qalǵan. Lıýdmıla birden qorshaýlardy ashyńdar dep buıyrǵan.

— Bárin bosatyp jibergende ıtterdiń arasynda tóbeles bastaldy, biz olardy minezi men jaratylysyna baılanysty ártúrli qorshaýǵa bólemiz. Kóbi uıasynan shyqpaı qoıdy, men olar tym qurymasa sý aǵynymen júzip ketýi úshin qorshaýlardy baltamen buza bastadym, — deıdi janýarlarǵa arnalǵan baspana ıesi. 

Foto L. Berestovanyń jeke muraǵatynan

Sýǵa belshesinen batqan Lıýdmılany kúıeýi ázer qutqaryp qalǵan. Tasqyn sý olardy qorshaý syrtyna shyǵaryp tastaǵan.

Itterdiń kóbi qashyp qutyldy. Keıbirin adamdar quıryǵynan tartyp júk kóligine otyrǵyzǵan.

Qazirgi ýaqytta izdeý-qutqarý jumystary jalǵasyp jatyr.