Qostanaı oblysynda ázirge 194 úıdiń ıesine jańa baspana beriledi - ákimdik
«Oblystyń eki qalasy men tórt aýdanynda tótenshe jaǵdaı jarııalandy. Atalǵan óńirlerdiń bárinde zardap shekkenderge shyǵyndy óteý boıynsha komıssııalar quryldy. Tólem týraly sheshimdi komıssııalar jyljymaıtyn, jyljymaly múlikterdi, maldy baǵalap, tehnıkalyq tekserý ótkizgennen keıin qabyldaıdy.
Búgingi tańda 353 nysan tekserildi. Onyń ishinde 159 úı qalpyna keltirýge jaramdy. Olardyń búliný deńgeıin baǵalanǵannan keıin óteýge jatatyn zalal somasy belgilenedi. Qalpyna keltirýge jaramsyz 194 úı tirkeldi. Olardyń ıelerine jańa baspana beriledi», - dedi ol ortalyq kommýnıkatsııalar qyzmetinde ótken brıfıngide.
Onyń aıtýynsha, oblystyń ońtústik óńirlerinde mal kóp qyrylǵan.
«Veterınarııalyq qyzmettiń málimeti boıynsha, sý tasqyny saldarynan mal ólimi 951 basqa jetken. Sonyń ishinde 214 bas maldy baǵalaý aıaqtaldy. Endi ótemaqy berý máselesi pysyqtalyp jatyr.
Elektr jelileriniń 1414 baǵany, sonyń ishinde 52 joǵary voltty tirek zaqymdalǵan. Barlyq iri eldi mekenderde elektrmen jabdyqtaý qalpyna keltirildi, biraq shamamen 26 shaǵyn eldi meken áli kúnge deıin elektr qýatynsyz qalyp otyr. Qazirgi tańda smeta ázirlendi, qajetti materıal, tirekter ázirlenip jatyr.
Zardap shekken halyqqa áleýmettik qoldaý jumystary sý tasqynynyń alǵashqy kúnderinen bastap júrgizilýde. Búgingi tańda birjolǵy tólemge 1345 ótinish tústi. 715 ótinish boıynsha 166 mln teńge tólendi, ótinishterdi qabyldaý jáne tóleý jumystary jalǵasýda», - dedi ákimniń orynbasary.