Qostanaı oblysynda aýylǵa ınternet tartýǵa jyl saıyn 1 mlrd teńge bólinbek
«Qostanaı oblysynyń 29 aýylynda áli kúnge deıin ınternet pen baılanys joq. Búkil oblys úzilissiz ınternetpen jáne baılanyspen qashan qamtamasyz etiledi?», – dep surady jýrnalıst ortalyq kommýnıkatsııalar qyzmetinde ótken brıfıngte.
«Halyqpen kezdeskende osy másele ylǵı da kóteriledi. Óıtkeni búgingi tańda ınternetsiz ómir joq. Solaı emes pe? Balalarǵa da, úlkenderge de sapaly ınternet kerek. Jańa ǵana aıtqanymdaı, 490 aýyldyń tek 67 paıyzynda ǵana sapaly ınternet bar. Sapaly ınternet dep turǵanym – 4G. Qalǵandarynda 3G, 2G – sapasyz ınternet», – dedi oblys basshysy.
Ákimniń aıtýynsha, atalǵan máselege oblys bıýdjetinen jyl saıyn 1 mlrd teńge bólip otyrý kózdelgen.
«Sondyqtan jańa aıtyp óttim, «Qazaqtelekom» jáne «Beeline» kompanııalarynyń basshylyǵymen memorandým jasadyq, kelistik. Jyl saıyn oblystyq bıýdjetten 1 mlrd teńge bólinetin bolady. Machta qoıamyz. Sol machtaǵa atalǵan eki kompanııa qural-jabdyqtaryn qoıady. Jyl saıyn eń keminde 50 shaqty aýyldy jaqsy ınternetpen qamtımyz», – dedi Qumar Aqsaqalov.