Qostanaı men Pavlodardaǵy taý-ken óndirý kásiporyndaryna 259 mlrd teńge ınvestıtsııa baǵyttalady

ASTANA. QazAqparat – QR Úkimeti men «Alıýmınıı Kazahstana» AQ ınvestıtsııalar týraly kelisimge qol qoıýy múmkin. Tıisti qujat «Ashyq» NQA portalynda jarııalandy, dep habarlaıdy QazAqparat tilshisi.

«QR Úkimeti men «Alıýmınıı Kazahstana» Aktsıonerlik qoǵamynyń arasynda Investıtsııalyq mindettemeler týraly kelisimniń jobasy maquldansyn. Indýstrııa jáne ınfraqurylymdyq damý mınıstri Marat Qarabaevqa qaǵıdattyq sıpaty joq ózgerister men tolyqtyrýlar engizýge ruqsat bere otyryp, QR Úkimeti atynan «Alıýmınıı Kazahstana» Aktsıonerlik qoǵamy arasyndaǵy ınvestıtsııalyq mindettemeler týraly kelisimge qol qoıýǵa ókilettik berilsin», - delingen qujatta.

Kelisimde jazylǵandaı, ınvestor «Alıýmınıı Kazahstan» AQ taý-ken óndirý kásiporyndaryna 259 mlrd 024 mln 100 myń teńge ınvestıtsııa salady. Mindetteme aıasynda myna salalarǵa qarjy baǵyttalady:

- Qostanaı jáne Pavlodar oblystaryndaǵy taý-ken óndirý bólimsheleriniń esepten shyǵarylatyn negizgi quraldaryn aýystyrý jáne jańa negizgi quraldardy satyp alý – 59 mlrd 615 mln 050 myń teńge;

- Pavlodar oblysyndaǵy qaıta óndirýshi jáne kómekshi bólimsheleriniń esepten shyǵarylatyn negizgi quraldaryn aýystyrý jáne jańa negizgi quraldardy satyp alý - 115 mlrd 380 mln 700 myń teńge;

- Qostanaı jáne Pavlodar oblystaryndaǵy taý-ken óndirý bólimsheleriniń óndirý qýattaryn kúrdeli jóndeý - 36 mlrd 366 mln 700 myń teńge;

- Pavlodar oblysyndaǵy bólimshelerdiń óndirýshi jáne basqa kómekshi qýattaryn kúrdeli jóndeý - 47 mlrd 661 mln 650 myń teńge.

Kelisim jobasy 20 sáýirge deıin kópshilik talqylaýda bolady.