Qostanaı mańyndaǵy eldi mekenniń 48 turǵyny baspanaly boldy

QOSTANAI. QazAqparat - Qala mańyndaǵy Zarechnyı kentiniń 48 turǵyny Konstıtýtsııa kúnin jańa baspanalarynda qarsy alady. «Nurly jer» baǵdarlamasy aıasynda salynǵan baspanalardyń kiltterin búgin oblys ákimi Arhımed Muhambetov tabys etti, dep habarlaıdy QazAqparat tilshisi.

Jergilikti atqarýshy organdar sońǵy úılerdi tapsyrý arqyly atalmysh kenttiń «Soltústik» shaǵyn aýdanyndaǵy kópqabatty úılerdiń qurylysyn tolyǵymen aıaqtady.

«Biz tórtqabatty 11 úı turǵyzdyq. Olardyń úsheýi - jalǵa beriledi, 8 - nesıelik. Búgin 48 páterli sońǵy úıdi tapsyramyz. Olar jergilikti atqarýshy organdarda kezekte turǵan azamattarǵa arnalǵan. Búgin 10 jetim bala jańa úıleriniń tabaldyryǵyn attady. Páter ıeleriniń qalǵandary - áleýmettik álsiz toptar ókilderi men bıýdjettik uıymdardyń qyzmetkerleri. Shaǵyn aýdannyń qurylysyna shamamen 2,2 mlrd teńge jumsaldy», - dedi Qostanaı aýdany ákiminiń orynbasary Omarbek Qasymov.

Jańa baspana ıelerin qonystoılarymen quttyqtaý úshin oblys ákimi Arhımed Muhambetov te keldi.

«Respýblıka úshin asa mańyzdy memlekettik meıram - Konstıtýtsııa kúni qarsańynda, sondaı-aq elordanyń 20 jyldyǵyna oraı «Nurly jer» baǵdarlamasy aıasynda jańa úı paıdalanýǵa berilip otyr. Eń bastysy, oblysta jyl saıyn jańa páterler kóptep salynýda. Bıylǵy jyly ǵana 300 myń sharshy metrden astam aýmaqty paıdalanýǵa beretin bolamyz. Bul ótken jylǵy kórsetkishpen salystyrǵanda, ortasha eseppen 10 paıyzǵa joǵary», - dedi óńir basshysy.