Qostanaı kásiporyndary jyl basynan beri 610 mlrd teńgeden astam somaǵa ónim shyǵarǵan
Investıtsııalyq ahýaldy jaqsartý máseleleri jáne onyń óńirdegi áleýmettik-ekonomıkalyq damý deńgeıine áserin talqylaý kezdesýdiń negizgi taqyryby boldy.
Komıtet tóraǵasy Sultanbek Mákejanov otyrysty asha kelip, elimizdiń ekonomıkasy ınvestıtsııa tartýǵa kedergi keltiretin problemalyq máselelerdi joıý jónindegi turaqty túrde atqarylatyn jumystar men aýqymdy reformalardy talap etetinin atap ótti.
«Búginde bıznes ortasyn jaqsartý jáne barlyq baǵyttaǵy ınvestıtsııanyń ekonomıkalyq áserin kúsheıtý jóninde aýqymdy jumys atqaryldy. Bizdiń komıtet arnaıy ekonomıkalyq aımaqtar jumysynyń tıimdiligi máseleleri boıynsha sharalardy udaıy qolǵa alyp keledi, sonyń ishinde kóshpeli otyrystardy da ótkizdi. Onda birqatar kemshilikter anyqtaldy, sonyń nátıjesinde zańnamalyq aktiler aıasynda sheshý joldary tabyldy, sondaı-aq bıýdjettik qarjylandyrýǵa ózgeris engizý júzege asty», - dedi senator Mákejanov.
Qostanaı oblysy ákimdiginiń ókili óz kezeginde óńirdegi ahýal týraly aıtyp berdi. Máselen, ol 2023 jyldyń qańtar-naýryz aılary aralyǵynda ónerkásip kásiporyndary 610 mlrd teńgeden astam somaǵa ónim shyǵarǵanyn habarlady. Eń úlken úles óńdeý ónerkásibine 70% jáne taý-ken salasyna 26% tıesili bolyp otyr. Jalpy, óńirge 2022 jyly shamamen 486,5 mlrd teńge ınvestıtsııa tartyldy.
Otyrys barysynda ulttyq ekonomıka, ındýstrııa jáne ınfraqurylymdyq damý, syrtqy ister, aýyl sharýashylyǵy mınıstrlikteriniń ókilderi, sondaı-aq jergilikti kásipkerler ınvestıtsııalyq saıasatty damytý týraly baıandama jasady.
Depýtattar kóshpeli otyrys aıasynda «Batys» kishi elektr stantsııasynda, avto bólshek shyǵaratyn eki zaýyt salyp jatqan qurylys alańynda, mashına jasaý zaýytynda jáne óńirdegi basqa da birqatar áleýmettik nysandarda boldy.
Depýtat Sultanbek Mákejanov sapardy qorytyndylaı kelip, qatysýshylar usynǵan materıaldar negizinde, sondaı-aq ótkizilgen otyrystyń nátıjeleri boıynsha Qarjy jáne bıýdjet komıteti Úkimettik saǵatta aıtylatyn jáne olardy júzege asyrý úshin Úkimetke jiberiletin usynymdar ázirlenetinin atap ótti.