Qostanaı qalasyndaǵy lıftilerdiń teń jartysy jaramsyz
Oblysta qurylys nysandaryna júrgiziletin tekseris bıyl 30%-ǵa kemigen. Desek te, óńirde jańa boı kóterip jatqan qurylys nysandary kóp. Olardyń jumys sapasy jiti baqylaýda bolýy tıis. Osy maqsatta jyl basynan beri jospardan tys 195 tekseris júrgizilgen. Nátıjesinde 155 ákimshilik is qozǵalyp, jalpy somasy 51,7 mln teńge kóleminde aıyppul salynǵan.
Tekseris barysynda basqarma mamandary turǵyn úı qurylysyn jáne ınjenerlik ınfraqurylym jobalaryn jasaýmen aınalysatyn 2 seriktestikti sot arqyly lıtsenzııadan aıyrǵan. Sonyń biri - «Tselınstroı» JShS. Búginde is materıaldary Qostanaı oblystyq mamandandyrylǵan aýdanaralyq sotyna tústi.
Nurlan Qatarbekovtyń aıtýynsha, óńirdegi kóp qabatty turǵyn úı lıftileriniń jaı-kúıi máz emes. Oblys boıynsha qoldanysta 709 lıft bar. Onyń 7-eýi jóndeýdi qajet etedi. Qalǵan 289-yn paıdalaný merzimi ótip ketkendikten, bútindeı almastyrý kerek. Olar jaramsyz. Aldaǵy 5 jyl ishinde Qostanaı, Lısakov, Rýdnyı qalalaryndaǵy kóp qabatty turǵyn úılerde 300-ge jýyq lıftini jańartý josparlanǵan.
Oblys ákimi Arhımed Muhambetov lıft satyp alýdyń naqty jospary bolý kerektigine toqtaldy.
«Ózderińiz bilesizder, kórshi oblystarda lıfttiń isten shyǵýy saldarynan qaıǵyly jaǵdaılar boldy. Men sizderge árkez eskertip kelemin. Lıft satyp alýdyń arnaıy jospary bolýy qajet. Qazirgi kezde bir lıft 5-6 mln teńge turady. Jyl saıyn 100-150 mln teńge jumsasaq, 30-40 lıftini aýystyrýǵa bolady. Sondyqtan isten shyqqan jedelsatylardy jańartýdyń baǵdarlamasyn jasańyzdar. Aqaýy bar lıftiler týraly statıstıkany anyqtaýdan basqa jumys joq pa, álde? Bul úı kooperatıvteriniń jumysy emes. Olqylyqtyń ornyn durystańyzdar!», - dedi Arhımed Muhambetov jıyn barysynda.
Aımaq basshysynyń tapsyrmasyn alǵan tıisti organ basshylary jaqyn arada arnaıy jospar jasaýǵa ýáde etti.