Qostanaı qalasynda kópbalaly 30 otbasy baspanaly boldy

QOSTANAI. QazAqparat – QR Tuńǵysh Prezıdenti kúni qarsańynda Qostanaı qalasynyń ákimi Qaırat Ahmetov kópbalaly 30 otbasyǵa páter kiltterin tapsyrdy, dep habarlaıdy QazAqparat.

Qostanaı oblysynda Elbasy N.Nazarbaev bastamashy bolǵan «Áleýmettik qamqorlyq» sharalar keshenin oryndaý maqsatynda jyl basynan beri halyqtyń áleýmettik osal toptaryn turǵyn úımen qamtamasyz etý jumystary júrgizilýde. Osy jyldyń mamyr aıynda jalǵa berý shartymen 18 páter tapsyrylǵan bolatyn.

«Mine, búgin kópbalaly 30 ana páter kiltterin alyp otyr. Aldaǵy ýaqytta da osyndaı bastamalardyń kýási bolyp, áleýmettik turǵydan qorǵalatyn otbasylardy baspanamen kóbirek qamtamyz etetin bolamyz. Negizi bıyl Qostanaı qalasynda 575 mln teńgege 50 páter alý josparlanǵan. Olardyń barlyǵy kópbalaly jáne áleýmettik az qamtylǵan otbasylarǵa beriledi. Kópbalaly analardy qoldaý Elbasy men Prezıdent tapsyrmasyna saı keshendi túrde júrgizilip keledi. Sońǵy eki aıda 48 baspananyń kilti tabystaldy», – dedi qala ákimi Qaırat Ahmetov.

Jyl basynan beri Qostanaı qalasynda kópbalaly 80 januıa turǵyn úımen qamtamasyz etilgen. Jyl sońyna deıin taǵy 15-i «Baqytty otbasy» baǵdarlamasy boıynsha páter alatyn bolady.