«Qostanaı» halyqaralyq áýejaıynyń basshysyna aıyppul salyndy

QOSTANAI. QazAqparat – «Qostanaı» halyqaralyq áýejaıy» AQ basshysyna nysannyń terrorızmge qarsy qorǵalýyn tıisti deńgeıde qamtamasyz etpegeni úshin 195 myń teńge aıyppul salyndy. QazAqparat bul týraly Kóliktegi polıtsııa departamentine silteme jasap habarlaıdy.

«QR «Terrorızmge qarsy is-qımyl týraly» Zańyna sáıkes kólik polıtseıleri «Qostanaı» halyqaralyq áýejaıy» AQ obektisin tekserý barysynda mekeme basshysynyń ózine senip tapsyrylǵan nysannyń terrorızmge qarsy qorǵalýyn qamtamasyz etý jáne qaýipsizdiginiń tıisti deńgeıin saqtaý jónindegi mindetterdi tıisinshe oryndamaǵany anyqtaldy», - deıdi Kóliktegi polıtsııa departamenti Ekstremızmge qarsy is-qımyl basqarmasynyń bastyǵy Erlan Álimov.

Onyń aıtýynsha, bıylǵy 1 qyrkúıekte polıtsııa qyzmetkerleri tekserý aktisine sáıkes, QR ÁQBtK-niń 149-babynyń 1-bóligimen (terrorıstik turǵydan osal obektiniń terrorızmge qarsy qorǵalýyn qamtamasyz etý jáne qaýipsizdiginiń tıisti deńgeıin saqtaý jónindegi mindetterdi oryndamaý jáne (nemese) tıisinshe oryndamaý) ákimshilik quqyq buzýshylyq týraly hattama toltyrdy.

Atalǵan ákimshilik is Qostanaı qalasynyń mamandandyrylǵan ákimshilik sotyna jiberildi.

«14 qazan kúni sot «Qostanaı» halyqaralyq áýejaıy AQ basshysyn ákimshilik quqyq buzýshylyq jasaǵany úshin kináli dep tanyp, oǵan 70 AEK kóleminde aıyppul túrinde ákimshilik jaza qoldandy», - dedi E.Álimov.