Qostanaı halyqaralyq áýejaıyna Ahmet Baıtursynovtyń esimi berilýi múmkin

QOSTANAI. QazAqparat - Qostanaı oblystyq máslıhatynyń kezekti sessııasynda jergilikti áýejaıǵa Ahmet Baıtursynovtyń esimin berý máselesi qaraldy, dep habarlaıdy QazAqparat.

Oblystyq mádenıet basqarmasynyń basshysy Erlan Qalmaqovtyń aıtýynsha, oblystyq onomastıka komıssııasyna Qostanaı halyqaralyq áýejaıyna Ahmet Baıtursynovtyń esimin berý jaıynda usynys túsken.

- Mundaı bastamany áýejaıdyń eńbek ujymy men kásipodaq músheleri kóterip otyr. Másele 4 aqpan kúni ujymnyń jınalysynda sóz bolyp, talqylanǵan. Jıynda atalmysh bastamany sonda jumys isteıtin 128 adam túgel qoldaǵan. Zań boıynsha nysannyń ataýyn aýystyrý usynysy QR Úkimeti janyndaǵy onomastıka komıssııasynda qaraýdyń aldynda áýeli oblystyq máslıhatta talqyǵa salynýy tıis, - dedi Erlan Qalmaqov jıynda.

Onyń aıtýynsha, bıyl Ahmet Baıtursynovtyń 150 jyldyq mereıtoıy UNESCO kóleminde toılanady.

Qostanaıda merekelik sharalar 28 aqpanda bastalyp ketti.

- Jergilikti atqarýshy organdar osy ataýly dataǵa oraı is-sharalar josparyn iske asyrady. Qurmetti depýtattar, usynysty qoldaısyzdar dep úmittenem, - dep atap ótti basqarma basshysy.

Máslıhat depýtattary usynysty biraýyzdan qoldady.