«Qostanaı fýtbolynyń tarıhy» kórmesi ashyldy
Oblystyq fýtbol federatsııasynyń vıtse-prezıdenti Bolat Ysqaqovtyń aıtýynsha, mundaı kórme óńirde tuńǵysh ret ashylyp otyr.
«Qostanaı fýtbolynyń tarıhy «Tobyl» klýbymen tyǵyz baılanysty. Sondyqtan atalmysh kórmeni osy klýbtyń bazasynda ashyp otyrmyz. Mundaǵy maqsat -qala turǵyndary men qonaqtaryna, ásirese, balǵyn fýtbolshylarǵa Qostanaı sportynyń tarıhyn kórsetý. Elbasy óziniń baǵdarlamalyq maqalasynda da tarıhtan ajyramaý týraly basa aıtty. Sol sebepti de, osy kórmeniń ashylýyn rýhanı jańǵyrýdy ispen kórsetýdiń úlgisi der edim», - deıdi B.Ysqaqov.
Kórmege alǵash kelýshilerdiń arasynan óńirge belgili fýtbol mamany Evgenıı Slastnıkovty sózge tarttyq. Ol 20 jyldan astam ýaqyttan beri «Tobyl» fýtbol klýbynyń jankúıeri.
«Búgingi kórme jurtshylyqty Qostanaı fýtbolynyń tarıhymen tanystyrady. Mysaly, 2003 jyly ÝEFA ótkizgen «Polonııa» - «Tobyl» kezdesýiniń hattamasy saqtalypty. Osydan birer jyl buryn ataqty Frank Raıkaardtyń Qostanaıǵa kelgeni biz úshin kútpegen jańalyq boldy. Mine, sol sát búgin qaıta eske túsip otyr. Munda 70 jyl burynǵy túsirilgen sýretter, komanda utqan kýboktar men medaldar qoıylǵan. Osyndaı kórme oblystyń basqa qalalarynda ashylsa, jas aıaqdopshylar úshin keremet syılyq bolar edi», - dedi fýtbol ardageri.
Aıta keteıik, Qostanaıdaǵy ortalyq stadıonda Qazaqstan fýtbolyn damytýdyń 2022 jylǵy deıingi strategııasy tanystyrylyp jatyr. Dóńgelek ústelge Qazaqstan fýtbol federatsııasy buqaralyq fýtbol departamentiniń basshysy Erlan Jamantaev qatysýda. Jıyn sońynda qostanaılyq fýtbol mamandarynyń strategııaǵa baılanysty usynystary qaralady.