«Qostanaı-Áýlıekól» joly aqyly bolady

QOSTANAI. QazAqparat - Qostanaı oblysynda halyqaralyq «Almaty-Ekaterınbýrg» joly aqyly bolady, dep habarlaıdy QazAqparat «QazAvtoJol» UK» AQ oblystyq fılıalynyń dırektory Nurbek Temirhanovqa silteme jasap.

Jyl sońyna deıin Qostanaı oblysynda 422 shaqyrymǵa sozylǵan tasjol aqyly bolady. Bul aralyqqa halyqaralyq «Almaty-Ekaterınbýrg» joly da kiredi. Aqyly beketter 2019 jyly qoıylady. Bir jyldan soń kólik júrgizýshileri aqy tóleı bastaıdy. 

«Qazirgi ýaqytta Astana qalasynan bastalatyn «Astana-Troıtsk» baǵytyn aqyly etý sharalary talqylanyp jatyr. Bul baǵyt Qostanaı oblysy shekarasyndaǵy «Qaıraq» ótkizý beketinde túıindeledi. Jol aqysy negizinen júk kólikterinen alynady. Aqsha somasy kóliktiń salmaǵyna baılanysty bolady», - dedi Nurbek Temirhanov.

Mamandardyń sózinshe, mundaı shara respýblıkalyq bıýdjetke túsetin aýyrtpalyqty azaıtý úshin engizildi. Nurbek Temirhanov naqty tarıf qunyn aıtqan joq. Óıtkeni, bul másele áli qaralý ústinde. Ázirge belgilisi, aqyly jol eki bólikten turady. Birinshisi - «Almaty-Ekaterınbýrg M-36» tasjoly. Al ekinshi baǵyt - «Qostanaı-Áýlıekól-Qorǵan». Atalǵan joldarda jol aqysyn esepteıtin beketterde avtomatty tarazylar ornatylady. Aqyly joldan túsken paıda oblystaǵy joldardy jóndeýge jumsalady. 

Buǵan deıin habarlaǵanymyzdaı, bıyl Qazaqstandaǵy úsh jol ýchaskesinde aqyly júıe testilik rejimde iske qosylady.