Qostanaı áýejaıyn qaıta jańǵyrtý jumystary bastaldy
Bul týraly Qostanaı oblysynyń ákimi Qumar Aqsaqalov elordada Ortalyq kommýnıkatsııalar qyzmetinde ótken baspasóz máslıhatynda aıtty.
«Bıyl áýejaıdy qaıta jańǵyrtý jumystary bastalǵanyn atap ótkim keledi. Jobada aerovokzal alańyn 5,2 myń sharshy metrden 8,7 myń sharshy metrge deıin, sondaı-aq ótkizý qabiletin saǵatyna 250 jolaýshyǵa deıin ulǵaıtý kózdelgen», - dedi Q. Aqsaqalov.
Ákimniń aıtýynsha, bul sharalar bir ýaqytta 7 reısti qabyldaýǵa, ushý geografııasyn keńeıtýge, ushyp kelý zalynyń ótkizý qabiletin arttyrýǵa, sondaı-aq jolaýshylarǵa qyzmet kórsetý sapasyn jaqsartýǵa múmkindik beredi.
Eske sala ketsek, byltyr Ahmet Baıtursynulynyń mereıtoıy jyldyq aıasynda Qostanaı halyqaralyq áýejaıyna ult ustazynyń esimi berildi. Bul bastamany áýejaıdyń ujymy kótergen.
Buǵan deıin Qumar Aqsaqalov óńirdegi avtojol jaǵdaıyn baıandap, oblys joldarynyń 85% jaqsy jáne qanaǵattanarlyq jaǵdaıda ekenin aıtqan edi.