Qostanaı aýdanynda abattandyrý jumystaryna qomaqty qarjy bólindi
Bıyl Qostanaı aýdanynda «Týǵan jer» baǵdarlamasy sheńberinde 99 memorandýmǵa qol qoıylǵan. Onyń kóbisi jergilikti kásipkerlerdiń qatysýymen jasalǵan. Máselen, jaqynda ǵana ashylǵan Ybyraı Altynsarın kesenesiniń jańartylýyna 81 mln teńge kóleminde qarjy bólingen. Sondaı-aq, basqa da áleýmettik nysandar boı kóterip, aýdan ortalyǵynda abattandyrý jumystary júrgizilýde. Aýdandaǵy 5 kompanııa birigip, turǵyn úı kesheni men balalar alańyn salýdy josparlap otyr. Kóshelerge beınebaqylaý qurylǵylary ornatylmaq. Atalǵan jumystarǵa ıgeriletin qarjynyń barlyǵy kásipkerlerden alynady.
«Abattandyrý jumystaryna 40 mln teńge qarastyryldy. Bul qarajattyń edáýir bóligi joldardy ortasha jóndeýge baǵyttalǵan. Jyl basynan beri Qostanaı aýdanynda 13 iri joba qolǵa alynǵan. Qazir onyń 4-eýi aıaqtaldy. Endi kóshelerdi kórkeıtýge kásipkerler atsalysamyz dep otyr. Aldaǵy ýaqytta «Týǵan jer» baǵdarlamasy negizinde birneshe nysan jańa keıipke enedi», - dedi Qostanaı aýdany ákiminiń orynbasary Bolat Bekenov.
Aýdan ákimi orynbasarynyń aıtýynsha, Zatoboldaǵy №1 orta mektep jaqynda ortalyq káriz júıesine qosyldy. Oǵan 20 mln teńge jumsalǵan. Altyn Dala aýylyndaǵy mekteptiń jóndelýine 5 mln teńge jaratyldy.