Qostanaı ártisteri qoıylymnan túsken qarajatty Arysqa aýdardy
Shyǵarmashylyq ujym ótken kezeńdi jemisti aıaqtap otyr. Maýsym boıynsha 7 premera kórermenge jol tartty. Teatrdyń kórkemdik jetekshisi, belgili teatr mamany Álııa Baımahannyń aıtýynsha, bıyl repertýarda tyń týyndylar kóbeıip, fars, rekvıem janrlarynda qoıylymdar sahnalandy.
«Bul jańa deńgeıge shyqqanymyz. Birneshe áriptesimiz laıyqty marapattar alyp, tósbelgi taqty. Gastroldik saparmen Ózbekstanǵa, Túrkistan oblysyn aralap qaıttyq. Endi Mońǵolııaǵa barýdy josparlap otyrmyz. «Botaqara-Sheshenbıke» tarıhı dramasynyń premerasy Baıan-Ólgıı qalasynda ótedi. Bul da elimizdiń mádenı ómirindegi eleýli jańalyq bolmaq. Eń bastysy, osy jyly teatr janynan kameralyq hor ashyldy», - dep atap ótti Álııa Baımahan.
Jabylý maýsymyna «Ánim sen ediń» (Shámshi týraly tamshylar) spektakli usynyldy. Ataqty kompozıtordyń shyǵarmashylyǵyna arnalǵan qoıylymdy ártister óte joǵary deńgeıde oınap shyqty. Spektaklden soń kameralyq hor túrli janrdaǵy birneshe týyndy oryndap berdi. Teatr dırektory Sabyraly Kemelbaev qoıylymnyń rejısserine, jalpy ujymǵa alǵysyn bildirdi. Aıta ketý kerek, qoıylym qaıyrymdylyq maqsatta uıymdastyryldy. Spektaklden túsken qarajat tolyǵymen Arystaǵy jarylystan zardap shekkenderge kómek retinde jiberildi.