Qostanaı ákimi Qaırat Ahmetov otstavkaǵa ketýi múmkin

NUR-SULTAN. QazAqparat - Qostanaı qalasynyń ákimi orynbasary úshin otstavkaǵa ketýi múmkin. Bul týraly QR Sybaılas jemqorlyqqa qarsy is-qımyl agenttigi 1-shi departamentiniń asa mańyzdy ister jónindegi tergeýshisi Danııar Bıgaıdarov aıtty, dep habarlaıdy QazAqparat tilshisi.

Onyń aıtýynsha, Qostanaı oblystyq sybaılas jemqorlyqqa qarsy qyzmeti Qostanaı qalasy ákimdiginiń jer qatynastary bóliminiń laýazymdy tulǵalaryna qatysty sotqa deıingi tergeýdi bastaǵan. Olar jer teliminiń naqty baǵasy 37 084 336 teńge bola tura, 4 524 607 teńgege deıin arzandatylǵan baǵaǵa aýdany 1,8804 gektar jer ýchaskesin jalǵa alý quqyǵyn satý boıynsha zańsyz aýktsıon ótkizgen. Osylaısha, memleketke keltirilgen shyǵyn 32 107 268 teńgeni qurap otyr.

«23 shildede Qostanaı qalasy ákiminiń ókimimen ákimniń teris qylyqtary úshin tergeýge alynǵan orynbasary Agdreı Fınk qyzmetinen bosatyldy. Eger onyń kinási sotta dáleldenetin bolsa, onda 10 kúntizbelik kúnniń ishinde qala ákimi Qaırat Ahmetov otstavkaǵa ótinish berýi tıis», - dedi Danııar Bıgaıdarov.