Kosta-Rıka ǵalymdary: Jylqynyń antıdeneleri — koronavırýsqa em

NUR-SULTAN. QazAqparat – Kosta-Rıka ǵalymdary jylqylardan alynǵan antıdeneler negizinde koronavırýsty emdeýdiń arzan ádisin synaýdy bastaıdy. Biraz ýaqyt buryn jylqylarǵa COVID-19 týdyratyn SARS-Cov-2 vırýsy egilgen bolatyn, dep habarlaıdy QazAqparat NY Post-qa silteme jasap.

Qyrkúıek aıynyń ortasynan bastap jylqy antıdenelerine negizdelgen dári-dármek 26 patsıentke synalady, dep habarlady qoǵamdyq densaýlyq saqtaý ortalyqtaryn basqaratyn áleýmettik saqtandyrý qorynyń prezıdenti Roman Makaıa. Dári-dármekti Kosta-Rıka ýnıversıtetiniń Klodomıro Pıkado ınstıtýty (ICP) ázirlegen bolatyn.

Kosta-Rıka bıligi zertteýdiń ekinshi bóliginiń nátıjesi jaqsy bolsa, dári-dármekti aýrýhanalarda keńinen qoldanýǵa úmittenedi. Búgingi tańda Kosta-Rıkada koronavırýspen aýyratyn 471 naýqas aýrýhanaǵa jatqyzyldy.

«Vaktsına qanshama adam ómirin qutqara alatyndyǵyn maqtan tutamyz, – deıdi Alberto Alape, joba úılestirýshisi. – Biz muny óz resýrstarymyzdyń kómegimen, kezekte turmaı nemese basqa eldermen básekelespeı-aq jasaımyz».

Mundaı zertteýler, sondaı-aq, Argentınada jáne Brazılııada júrip jatyr. Al bul ýaqytta belgııalyq ǵalymdar jylqynyń ornyna lamalardy paıdalanýda.

Bul zertteýler nátıje kórsetip jatsa, Kosta-Rıka ǵalymdary Ortalyq Amerıkanyń kedeı elderimen osy arzan emdik túrimen bólisýge daıyn ekenderin jetkizdi. «Biz pandemııa kezindegi ál-aýqatymyz kórshilerimizdiń ál-aýqatymen baılanysty ekenin túsinemiz», – dedi Alape.