Qosshyda aǵyn sýǵa arnalǵan shuńqyrdan 6 jasar balanyń denesi tabyldy
16:06, 27 Tamyz 2022
QOSShY. QazAqparat – Qosshy qalasynda aǵyn sýǵa arnalǵan shuńqyrdan (septık) 6 jasar balanyń denesi tabyldy, dep habarlaıdy QazAqparat tilshisi.
Aqmola oblystyq polıtsııa departamenti baspasóz qyzmetiniń málimetinshe, tamyzdyń 26-da saǵat 21:30 shamasynda Qosshy qalalyq polıtsııa basqarmasyna jergilikti turǵyn habarlasyp, eki saǵat buryn úı aýlasynda oınap júrgen 6 jasar ulynyń joǵalǵanyn aıtqan.
«Aıtylǵan mekenjaıǵa Qosshy qalalyq polıtsııa basqarmasynyń basshylyǵy, jeke quramy jáne jedel-tergeý toby bardy. Іzdeý jumystarynyń barysynda balanyń denesi aǵyn sýǵa arnalǵan shuńqyrdan tabyldy. Bul derek sotqa deıingi tergeýdiń biryńǵaı tiziliminde tirkeldi. Qaıǵyly jaǵdaıdy tergeý aıasynda tıisti saraptamalar taǵaıyndaldy», dedi vedomstvodan.
Aıta ketsek, budan buryn Aqmola oblysynda bir úıdiń eki balasy tútinge tunshyǵyp qalǵan edi.