Qosshyda 70 kásipker japsarjaıdan aıyrylýy múmkin
Osydan 6 jyldan astam ýaqyt buryn Qosshy qalasynyń 70 kásipkeri «Lesnaıa Polıana» turǵyn úı keshenindegi bıznes nysanyn aǵyn sý men qardan qorǵaý úshin japsarjaı salǵan. Sodan beri kásipkerler osy japsarjaı salynǵan jer telimin zańdastyra almaı keledi. Búgingi tańda keıbir bıznes sýbektilerine qatysty sot qosymsha qurylystardy alyp tastaý jóninde sheshim shyǵarǵan.
Óńirlik kásipkerler palatasy dırektorynyń orynbasary Rasýl Syzdyqovtyń aıtýynsha, Qosshy qalasynyń ákimi qatysqan keńeste bul másele kóterilgen. Sot oryndaýshylary kásipkerlerge jer telimin rásimdeýge ýaqyt beripti. Olar jergilikti atqarýshy organdar arqyly jer ýchaskelerin resimdeýi kerek edi. Alaıda, protses túrli sebeptermen uzaqqa sozylyp barady.
«Bul bir ǵana adamnyń máselesi emes, 70 kásipkerdi mazalap otyr. Al, Qosshy qalasynyń jergilikti atqarýshy organdary nysandardy óz balansyna alýǵa asyǵar emes. Ákimdik o basta durys jumys istegende, mundaı másele týyndamas edi»
, - deıdi «Atameken» UKP Kásipkerlerdi quqyqtyq qorǵaý departamentiniń dırektory Qýanyshbek Muqash.
Bıznes-ombýdsmen máseleni óz baqylaýyna alatynyn aıtty.
«Biz ashyq memlekette ómir súrip jatyrmyz jáne azamattardyń suranystaryna ýaqytly jaýap berýimiz kerek. Óńirlik kásipkerler palatasynyń sarapshylaryna apta saıyn aǵymdaǵy jaǵdaı týraly baıandaýdy tapsyramyn. Oblys ákimdiginen máseleni sheshýge qosylýdy jáne kásipkerler ruqsat qujattaryn alýy úshin jer ýchaskelerin Qosshy qalasy ákimdiginiń balansyna berýdi jedeldetýdi suraımyn»
, - dedi Qazaqstan kásipkerleriniń quqyqtaryn qorǵaý jónindegi ýákil Rýstam Júrsinov.
Aıta ketsek, Aqmola oblysynda oqýshylardy mektepke tasymaldaýdaǵy zańsyzdyqtar úshin 53 laýazymdy tulǵa jazalanǵan edi.