Qosshyda 65 mln teńgeniń jer ýchaskesi memleketke qaıtaryldy
Málim etilgendeı, Qosshy aýyldyq okrýgi ákiminiń ókimimen 2016 jylǵy tamyzda jaýapkershiligi shekteýli seriktestikke (JShS) aýdany 3,2778 gektar jer qaıtarý shartymen ýaqytsha paıdalanýǵa berilgen. Osy ókimniń negizinde JShS men Tselınograd aýdanynyń jer qatynastary bólimi arasynda tıisti shart jasalǵan.
Anyqtalǵandaı, bes jyldan keıin JShS quny 65 mln teńge bolatyn jer ýchaskesin jalǵa alý quqyǵyn ózge kásiporynǵa 120 mln teńgege satyp jibergen.
«Jaldaý merzimi birneshe ret uzartyldy. Alaıda, 2016 jyldan beri kásiporyn jer ýchaskesin nysanaly maqsatta paıdalaný boıynsha birde-bir áreket jasamaǵan. Qujattarǵa sáıkes, JShS ol jerge turǵyn úı keshenin salýdy kózdegen.
Kadastrlyq quny 65 mln teńge bolatyn jer ýchaskesi Qosshy qalasynyń ortalyǵynda ornalasqan jáne joǵary ınvestıtsııalyq tartymdylyǵy bar.
Mundaı tujyrymdy 2021 jyly JShS jerdi jaldaý quqyǵyn basqa zańdy tulǵaǵa 120 mln teńgege satyp jibergeninen jasaýǵa bolady.
Alaıda, qadaǵalaý organy jer ýchaskesi QR Jer kodeksiniń 48-babynyń normalaryn buza otyryp, atap aıtqanda, saýda-sattyq (konkýrstar, aýktsıondar) ótkizilmeı berilgenin anyqtady», - delingen habarlamada.
Osydan keıin prokýratýranyń usynysymen Aqmola oblysynyń Jer resýrstaryn basqarý departamenti (departament) jaldaý sharttaryn jaramsyz dep taný týraly talap-aryz engizgen.
«Aqmola oblysynyń Mamandandyrylǵan aýdanaralyq ekonomıkalyq sotynyń 2022 jylǵy 7 qarashadaǵy sheshimimen departamenttiń talap-aryzy jerdi memleketke qaıtarýmen tolyq kólemde qanaǵattandyryldy. Bul sheshim 2023 jylǵy 16 aqpanda zańdy kúshine endi.
Qosshy qalasy ákimdiginiń málimeti boıynsha osy jer ýchaskesinde «Jaıly mektep» ulttyq jobasyn iske asyrý sheńberinde mektep salý josparlanady», - delingen Bas prokýratýra málimetinde.