Qosshy qalasynyń ákimdigi №320 avtobýstyń keshigý sebebin túsindirdi

ASTANA. QazAqparat – Qosshy ákimdiginiń baspasóz qyzmeti Astana men qala arasynda qatynaıtyn №320 marshrýttyq avtobýsynyń nege keshikkenin túsindirdi, dep habarlaıdy QazAqparat tilshisi.

«№320 baǵdarda 8 avtobýs júredi, aralyǵy 13-20 mınýt. Alaıda 18.07.2023 jyly 8 avtobýstyń úsheýi tehnıkalyq sebepterge baılanysty baǵdarda bolmaǵannyń kesirinen júrý aralyǵy 60 mınýtqa uzarǵan. №320 baǵdardyń júrý aralyǵy «City Transportation Systems» JShS ortalyq dıspetcherlik qyzmetiniń baqylaýyna alynady», - delingen ákimdik málimetinde.

Ákimdik ókilderi qazirgi tańda júrgizýshi men avtobýs sanynyń jetkiliksiz bolýy marshýrttyq avtobýstardyń qatynaý jıiligin ulǵaıtýǵa kedergi keltirip otyrǵanyn aıtyp otyr.

«Qosshy qalasyna 4 baǵdarmen №302 (3 avtobýs), 303 (14 avtobýs), 320 (8 avtobýs), 323 (3 avtobýs) bas-aıaǵy 28 avtobýs qyzmet kórsetedi. Avtobýstardyń qozǵalys aralyǵy 8 mıntýttan bastalady. №320 baǵdardyń júrý aralyǵy - 14-20 mınýt. Búgingi tańda tasymaldaýshylarda júrgizýshilerdiń (900-den astam adam) jáne jyljymaly quramnyń (400-ge jýyq) jetispeýshiligine baılanysty, baǵdardaǵy avtobýs sanyn ulǵaıtý jáne aralyqty qysqartý qıynǵa soǵyp otyr. Alaıda, kesteler sanynyń ulǵaıýy 2023 jyly jyljymaly quramdy satyp alǵannan keıin qosymsha qaralady», - dep jazylǵan resmı aqparatta.

Aıta keteıik, redaktsııamyzǵa Qosshy qalasynyń turǵyndary 18 shilde kúni keshke qaraı Qosshy-Astana arasynda qatynaıtyn №320 avtobýsty bir jarym saǵat boıy kútkenin aıtyp shaǵymdanǵan bolatyn.