Qosshy qalasynda 98 jastaǵy soǵys ardageri tańdaýyn jasady

KÓKShETAÝ. QazAqparat – Búgin elimizde prezıdent saılaýy ótip jatyr. Osyǵan oraı Aqmola oblysynda daýys berý naýqany qyzý júrip jatyr, dep habarlaıdy QazAqparat tilshisi.

Elimiz úshin mańyzy zor saıası naýqanǵa atsalysýǵa tilek bildirgender qatarynda Qosshy qalasynyń 98 jastaǵy turǵyny, soǵys ardageri Nurqasym Ájitaev te bar.

Bar ǵumyryn eldiń ıgiline arnaǵan soǵys ardageri ózi tirkelgen №745 saılaý ýchaskesine baryp, daýys berdi.

«Jasym júzdi alqymdasa da, el azamaty retinde saıası naýqannan shet qalýdy jón kórmedim. Óıtkeni, osy saılaý arqyly memleketimizdiń jáne óskeleń urpaǵymyzdyń keleshegin qalyptastyrýǵa úles qosamyz», – dedi ardager.

Aqmola oblystyq saılaý komıssııasynyń málimetinshe, saǵat 18:00-de óńirde saılaýǵa kelýshiler úlesi 75,82 paıyzǵa jetken.

Aıta ketsek, budan buryn alǵash ret daýys bergen kókshetaýlyq stýdentter syılyq alǵanyn jazǵan edik.