Qosshylyqtar sý tasqynyna qanshalyqty daıyn

<p>ASTANA. KAZINFORM &ndash; Bıyl Qosshy qalasyn qardan tazartý jáne sý tasqynynyń aldyn alý jumystaryna bıýdjetten 370 mln teńge qarajat bólingen. Qosshylyqtar qala mártebesin alǵannan keıin qazynadan úlestiriletin qarajat kólemi artyp, sáıkesinshe, sý tasqynyna qarsy sharalar da júıeli atqarylyp jatyr. &nbsp;Kazinform tilshisi Qosshy qalasyna baryp, sý tasqynynyń aldyn alý sharalarynyń barysymen tanysyp qaıtty.</p>

Qosshy qalasy ákiminiń orynbasary Áset Muqanovtyń aıtýynsha, kóktemgi sý tasqynynyń aldyn alý sharalaryn qysta qardan tazartý jumysynan bastaý mańyzdy. Bul rette, qystan beri 40-tan astam qar tasıtyn jáne 20 sý tasıtyn avtokólik, ınjenerlik tehnıkalar apattyń aldyn alýǵa jumyldyrylǵan. 

Foto: Oralhan Qojanov/Kazinform

«Bıyl jaýyn-shashyn mólsheri ótken jylmen salystyrǵanda eki ese kóp tústi. Ol azdaı, ótken kúz jańbyrly bolǵany belgili. Biz sý tasqynynyń aldyn alý sharalaryn qańtar-aqpan aılarynda qolǵa alyp, qar syrtqa shyǵarylyp otyrdy. Qalanyń óz polıgony bar. Qystygúni shamamen 161 myń tekshe metr qar shyǵaryldy», - dedi ol.

Foto: Oralhan Qojanov/Kazinform

Belgili bolǵandaı, bıyl 28 aqpanda qala ákiminiń ókimimen sý tasqynynyń aldyn alý boıynsha jedel shtab qurylǵan. Al 20 naýryzdan bastap kúnniń kúrt jylyp, qardyń erýine baılanysty atalǵan shtab táýlik boıy jumys rejımine kóshken. 

«Búginde shahar aýmaǵynda qar joq desek te bolady. Sý jaıylǵan kóshelerdi tazartý jumystary júrip jatyr. Kóshelerdi sý shaıýdyń joǵary kórsetkishi aldyńǵy kúni tirkeldi, qazir sýdy tartý jumysy jartylaı aıaqtaldy. Endi 1-2 kúnde jaǵdaı tolyǵymen turaqtalady. Sebebi tasqyn sýdyń deńgeıi tómendedi. Jedel shtab kúni-túni jumys istep jatyr. Turǵyndar sý basý qaýpi tóngen jaǵdaıda qaıda habarlasý kerek ekenin jaqsy biledi. Olarmen túsindirý jumystary júıeli júrgizildi», - deıdi Á.Muqanov.

Dese de, keıbir turǵyndar eskertýge qulaq aspaı, aýlasyndaǵy qardy tazalaýǵa asyǵa qoımapty. Tipti, keıbir bıznes sýbektileri de erejege baǵynbaǵan. Sáıkesinshe, aıyppul arqalaǵandar az emes. Ákimdik qol qýsyryp otyrmaı, turǵyndardyń aýlasyndaǵy qardy tazalaýǵa da kirisip ketken. Búginde qala kóshelerinen 71 myń tekshe metr sý sorylyp, syrtqa shyǵarylǵan. Sý sorǵylaý jumystary aıaqtalyp, qala qalypqa kelgennen soń kóshe joldaryn retke keltirý mańyzdy. Sebebi oıdym-oıdym, shuryq-tesik joldar az emes. 

Foto: Oralhan Qojanov/Kazinform

«Konkýrs aıaqtalýǵa jaqyn. Kelesi aptada merdiger kompanııa belgili bolady. ıAǵnı, kún jylynǵannan keıin shuńqyr joldardy jóndeý jumysyna kirisemiz. Qosshy qalasynyń kóshelerimen qatar, Lesnaıa polıana turǵyn úı alabynyń kóshe joldary da jóndeledi. Qalanyń aýmaǵy kún saıyn ósip keledi, sáıkesinshe atqarylatyn jumystyń kólemi de arta túsken», - deıdi spıker.

Foto: Oralhan Qojanov/Kazinform

Aıta keteıik, 2015 jyly Qosshy sý astynda qalyp, keıin sý tasqynynan zardap shekkenderge arnaıy kópqabatty turǵyn úıler salynǵan bolatyn.

Elorda ákimi Jeńis Qasymbek Astana qalasyna Qosshy qalashyǵynyń qosylý múmkindigine qatysty saýalǵa jaýap bergen edi.