Qosshy qalasyna jańa ákim taǵaıyndaldy

<p>ASTANA. KAZINFORM - Aqmola oblysy ákiminiń 2024 jylǵy 11 qarashadaǵy ókimimen Qosshy qalasynyń ákimi bolyp Azamat Kapyshev taǵaıyndaldy. Bul týraly Aqmola oblysynyń ákimdigi habarlady.</p>

Aqmola oblysynyń ákimi Marat Ahmetjanov Qosshy qalasynyń aktıvine jańa ákimdi tanystyra otyryp, Azamat Kapyshevtyń joǵary kásibı qasıetteri bar bilimdi jáne bilikti basshy ekenin atap ótti. Jańa basshylyqqa turǵyn úı-kommýnaldyq sharýashylyq, sonyń ishinde sýmen qamtamasyz etý, elektr jáne jylýmen jabdyqtaý, ınfraqurylym salalarynda birqatar mindetter qoıyldy.

Aımaq basshysy josparlanǵan barlyq nysandardyń ýaqytyly paıdalanýǵa berilýin jeke baqylaýǵa alýdy, sondaı-aq jylytý maýsymynyń sátti jáne úzdiksiz ótýin qamtamasyz etýdi tapsyrdy. Qala kelbetin jaqsartý, qoqys shyǵarý máselelerine erekshe nazar aýdarý qajettigi de aıtyldy.

Geografııalyq tıimdi ornalasýdy eskere otyryp, ınvestıtsııalardy tartý, kásipkerlik pen týrızmdi damytý jumystaryn jalǵastyrý qajet. Áleýmettik nysandardy iske qosý jáne jol jelisin damytý boıynsha belsendi jumys kútiledi.

Kezdesý sońynda Marat Ahmetjanov júktelgen mindetterdi júzege asyrýda tabys tilep, Qosshy qalasynyń burynǵy ákimi Gaıdar Qasenovke atqarǵan jumysy úshin alǵysyn bildirdi.