Qosshy qalasy Nura kanalynyń mańyna 2 myń túp alma aǵashy otyrǵyzyldy
Elordada, sonymen qatar qala mańyndaǵy eldi mekenderde jappaı «Taza Qazaqstan: Astana – tazalyq pen tártiptiń úlgisi» atty aýqymdy ekologııalyq aktsııa ótip jatyr.
Aıta ketsek, elordadaǵy negizgi alań Nura kanalynyń mańaıy Qosshy qalasynyń ýchaskeleri, Astana qalasynyń «Búkilqazaqstandyq orman otyrǵyzý kúni» jasyl beldeýi bolyp belgilengen. Osy aktsııa aıasynda atalǵan óńirge aǵash otyrǵyzý júrgizilip jatyr.
Osy oraıda Qazaqstan Ekologııa jáne tabıǵı resýrstar mınıstrligi, orman sharýashylyǵy janýarlar dúnıesi komıteti tóraǵasynyń orynbasary Erlan Qutpanbaev Kazinform tilshisine is-sharanyń basty maqsatyn aıtyp berdi.
«Aktsııanyń maqsaty – óńirlerdiń ekologııalyq jaǵdaıyn jaqsartýda el halqyn biriktirý. Osy arqyly árbir Qazaqstan azamatyn óz óńirlerindegi senbilikke qatysyp, týǵan ólke ekologııasyn jaqsartýǵa úles qosýǵa shaqyrý. Elimizdiń tazalyǵyna birge atsalysý. Biz búgin osynda 2 myń túp alma aǵashynyń kóshetin otyrǵyzyp jatyrmyz», - dedi Erlan Qutpanbaev.
Sonymen qatar maman bul otyrǵyzylǵan alma aǵashynyń kóshetteri 4-5 jylda jemis beretinin atap ótti.
«Bul is-sharaǵa Qazaqstan orman sharýashylyǵy, Qazgıdromet, «Jasyl aımaq» qyzmetkerlerinen quralǵan ujym qatysyp jatyr. Bul alma aǵashynyń kóshetteri «Jasyl aımaq» memlekettik kásiporynynyń arnaıy tuqym baǵynda, astananyń aýa raıyna úılestirilip ósirilgen. Sondyqtan bul kóshetter aldaǵy 4-5 jylda ónim bere bastaıdy», - dedi Erlan Nurqanatuly.