Qospaev bastaǵan qylmystyq topty shekaradan ótkizip jibergen Mashanlo 2,5 jylǵa sottaldy

ASTANA. QazAqparat – Jambyl oblystyq prokýratýrasy «Qospaev» uıymdasqan qylmystyq toby» degen atpen tanylǵan uıym múshelerin shekaradan zańsyz ótkizip jibergen kúdiktiniń sottalǵanyn habarlady, dep habarlaıdy QazAqparat tilshisi.

Qordaı aýdandyq sotynyń 25 sáýirdegi úkimimen uıymdasqan qylmystyq top músheleri Shalın, Imashev jáne Qospaevty memlekettik shekara arqyly ótkizý jumysyn uıymdastyrǵan M.A.Mashanlo Qylmystyq kodekstiń 394-babynyń 2-bóligi boıynsha 2 jyl 6 aıǵa bas bostandyǵynan aıyryldy.

Buǵan deıin habarlanǵandaı, aýdan prokýratýrasy qurǵan vedomstvoaralyq jedel tergeý toby Mashanlony áshkerelegen edi.

Ol byltyr 6 tamyzda Sortóbe aýylynyń aýmaǵynda atalǵan tulǵalardy Qazaqstannan Qyrǵyz Respýblıkasyna ótkizý beketinen tys jer arqyly ótkizip jibergen.

«Qospaev bastaǵan Shalın men Imashevke buryn Qarjylyq monıtorıng agenttigi reıderlik jáne uıymdasqan qylmystyq top qurǵany úshin halyqaralyq izdeý jarııalaǵanyn aıta ketý kerek» delingen organnyń áleýmettik jelidegi paraqshasynda.

Eske salsaq, byltyr jyl aıaǵynda Eldos Qospaev pen 6 adamǵa reıderlik qylmystyq top qurdy degen aıyppen izdeý jarııalanǵan bolatyn.