Qosman Aıtmuxametov monopolısterdiń múlik salyǵyn tómendetýdi surady
Onyń aıtýynsha, sońǵy bes jyldyń ishinde janar-jaǵarmaıyń baǵasy kóterilse de, Astanadaǵy tarıfter kóp ózgermedi. Alaıda, keıbir monopolısterdiń múlik salyǵyn qazirgi erejemen sanasa, olardyń tarıfterin kóterýge týra keledi.
«Búginde elektr jáne jylý enerııasyn óndirýshi kompanııa - «Astana-Energııa» AQ-sy qaıta qurý jumystaryn aıaqtap, 184 mlrd teńgeniń aktıvterin paıdalanýǵa berýdi josparlap otyr. Eger múlik salyǵyn qazirgi bazalyq stavkalarmen sanasa, onda tarıfterdi 30-40 protsentke kóterýge týra keledi. Mysaly, bizde 2010 jyldan beri sýmen jabdyqtaý qyzmetteri úshin múlik salyǵy 0,1 protsentti quraıdy. Sondyqtan depýtattardan osy bastamany qoldaýdy suraımyn. Barlyq kommýnaldyq kásiporyndar úshin múlik salyǵyn 0,1 protsenttiń deńgeıinde qaldyrsaq, tarıfter sol qalpynda qalady», - dedi Q.Aıtmuxametov.
Qala ákiminiń orynbasary EKSPO aıasynda salynǵan nysandardy jylýmen qamtamasyz etý úshin birneshe qondyrǵynyń iske qosylǵanyn da jetkizdi.
Onyń sózine qaraǵanda, atalǵan jylý qondyrǵylary «Astanajylýtranzıt» AQ esebenen salyndy. Ol shyǵyndardy óteý úshin kompanııanyń múlik salyǵyn tómendetý kerek. Bolmasa, tarıfter birtindep kóteriledi.
«Qazir biz besjyldyq tarıfpen ketetin bolsaq, jyl saıyn ol tarıfti 10-15 protsentke kóteretin bolamyz. Sóıtip, eń sońynda tarıftiń ósý kersetkishi 70 protsentti quraıdy. Sonda ǵana kompanııanyń shyǵyndary aqtalady. Sondyqtan qazirgi tarıften aýytqymaý úshin múlik salyǵy máselesin sheshý kerek», - dep atap kórsetti Q.Aıtmuxametov.