Kóshpendiler oıyny: Qazaq balýandary taǵy eki altyn jeńip aldy

<p>ASTANA. KAZINFORM- 5-shi Dúnıejúzilik kóshpendiler oıyndarynda qazaq kúresinen el qorjyny taǵy eki altyn júldemen tolyqty.</p>

Onyń birin – erler arasynda 60 keli salmaqta el namysyn qorǵaǵan Meıirjan Bereketov jeńip alsa, ekinshisin – áıelder arasynda 56 keli salmaqta beldesken Roza Nurmahammetova qanjyǵasyna baılady.

Bereketov fınalda ázerbaıjandyq E.Bakshıevty jeńse, Nurmahammetova sheshýshi básekede reseılik A.Fatıhovany qapy qaldyrdy.

Aıta keteıik, osyǵan deıin 52 keli salmaqta Nazerke Azamatova jeńimpaz atansa, oǵan deıin áıelder arasynda 48 keli salmaqta el namysyn qorǵaǵan Aıjan Jylqybaeva men erler arasynda 55 keli salmaqta Bekjan Tólepov 5-shi Dúnıejúzilik kóshpendiler oıyndarynyń chempıony atanǵanyn jazǵan bolatynbyz.