Kóshpendiler oıyny: 41 elden 114 sportshy toǵyzqumalaqtan júldeni sarapqa salady
Toǵyzqumalaq oıynynan bas tóreshi Baýyrjan Tólegenovtyń aıtýynsha, álemniń 41 elinen kelgen 114 sportshy júldege talasyp jatyr.
– Oıyn shartyna sáıkes, ár elden 2 er jáne 2 áıel sportshy qatysýǵa bolady. Jalpy, 41 elden 114 sportshy (65 er jáne 49 áıel) baq synap jatyr. Sportshylar jekeleı synda júldege talasyp, onyń qortyndysy boıynsha komandalyq júldegerler anyqtalady,- dep atap ótti bas tóreshi.
Bekitilgen erejege saı, básekege 14-75 jas aralyǵyndaǵy sportshylar qatysa alady.
– Ázerbaıjan, Chehııa jáne Túrkııadan kelgen 14 jasar qatysýshylar bar. Sondaı-aq, zeınetke shyqqan egde jastaǵy qatysýshylarymyz da kóp,- deıdi Baýyrjan Tólegenov.
Aıta keteıik, Qazaqstan quramasy sapynda Bostandyq Beksultan (Qyzylorda obylysy), Áýelbaı Ersultan (Astana qalasy), Qojanásip Ańsaǵan (Qaraǵandy obylysy) jáne Serikqyzy Móldir (Aqtóbe obylysy) el namysyn qorǵaıdy.
Toǵyzqumalaq oıynynyń fınaldyq básekesi 11 qyrkúıekte ótedi.
Al júldegerlerdi marapattaý sharasy 12 qyrkúıek kúni etnoaýylda bolady.