Kóshpendiler oıyndary: Sadaq atýdy ınternet jelisinen úırendim – Marat Beksultanuly

<p>ATYRAÝ. KAZINFORM &ndash; Astanada ótetin V Dúnıejúzilik kóshpendiler oıyndaryna 100-ge jýyq sadaqshy qatysady. Sonyń biri &ndash; atyraýlyq sportshy, sadaq atýdan sport sheberi Marat Beksultanuly. Buǵan deıin ol el chempıonatynda jeńimpaz atanyp, halyqaralyq týrnırlerden júlde alǵan.</p>

Marat Beksultanulynyń mamandyǵy – zańger. Biraz jyl memlekettik qyzmette jumys istegen. Tipti laýazymdyq qyzmet atqarǵan. Biraq, 4 jyldan beri jeke sharýashylyqpen aınalysýǵa bet burǵan. Qazir atyraýlyqtarǵa dástúrlik sadaq atýdy úıretip júr.

«Bizdiń halqymyzdyń kóshpendilerge tán ulttyq óneri kóp. Dástúrli án, kúı mektebi qalyptasqan. Baǵzy dáýirde ań aýlaýǵa shyqqan babalarymyzdyń bárinde birdeı beren myltyq bolmaǵan shyǵar. Osy turǵydan aıtqanda, sadaq atýdy sol babalardan qalǵan asyl muraǵa jatqyzýǵa bolady. Al, ony jas urpaqqa keńinen nasıhattap júrmiz be? Osy saýal tóńireginde oılanyp, «Bul isti nege qolǵa almasqa?» degen toqtamǵa keldim. Biraq, Atyraýdan sadaq atýdyń qyr-syryn úıretýdi qolǵa alǵan úıirme tappadym. Sol sebepten, ózim sadaq atýdy úıretetin sabaqty ınternet jelisinen taýyp aldym. Sol arqyly sadaq atýdy meńgerdim», -deıdi Marat Beksultanuly.

Sadaqshynyń aıtýynsha, qazir sadaq atý mektebin qalyptastyra bastaǵan. Arnaıy federatsııa ashyp, shákirt tárbıeleýdi qolǵa alǵan. 

Foto: Keıipkerdiń jeke muraǵatynan

«Sadaq atýmen aınalysýdyń paıdasy óte kóp. Aldymen, bul – adamnyń rýhanı jetilýine, fızıkalyq damýyna oń áser etetin ári óner, ári sport. Ekinshiden, jas býynnyń minez-qulqynyń salmaqty bolýyna yqpalyn tıgizedi. Sadaq atýdy meńgergen jastardyń minezi baısaldy bolady. Óıtkeni, sadaqshyǵa baısaldylyq aýadaı qajet. Bul sportta ashýmen, asyǵystyqpen jeńiske jetý múmkin emes. Úshinshiden, sadaq atqan adamnyń eptiligi, sheberligi jetiledi», -deıdi Marat Beksultanuly.

Qazir ol «Batýhan jebesi» federatsııasynyń jumysyn jandandyrýǵa jumystanyp júr. Bıyl jergilikti bıýdjetten qarjy bólingen. Óziniń 40-qa jýyq shákirti bar. Atyraýdan 4 sportshy irikteý jarysyna qatysqan.

«Atyraý oblysynda sońǵy 4-5 jylda dástúrli sadaqshylar sany 100-ge jýyqtady. Olardyń arasynda 7 jasar bala da, jasy 60-qa taıaǵan úlkender de bar. El quramasyna Atyraýdan menimen birge Baýyrjan Aqtaev, Álı Sesıgúzel, Mádına Bısembıeva alyndy. Endi V Dúnıejúzilik kóshpendiler oıyndarynda eldiń namysyn qorǵap, jaqsy nátıje kórsetetýim qajet», - deıdi Marat Beksultanuly.

Eske sala ketelik, budan buryn Atyraýdan V Dúnıejúzilik kóshpendiler oıyndaryna 3 sportshy qatysatynyn habarlaǵan edik.