«Kóshpendiler dalasy»: Almatydaǵy halyqaralyq kórmede tazylar tanystyryldy
Halyqaralyq kórmege Qazaqstan, Ózbekstan, Qyrǵyzstan jáne Reseıden barlyǵy 500-den astam ıt ákelingen.
Sondaı-aq, kórme kezinde 50-den astam ıt, onyń ishinde qazaq tazylary asyl tuqymdy ıtterdiń resmı standartyna sáıkes baǵalanyp, ulttyq jáne halyqaralyq chempıondyq ataqty sarapqa salady. Oǵan Nıderland, Slovakııa, Grekııa jáne Qytaıdan kelgen halyqaralyq sarapshylar tórelik etedi.
— 28-29 qyrkúıek kúnderi Almatyda úsh is-shara ótip jatyr. Olar: ulttyq kórme, halyqaralyq kórme jáne monotuqymdy tazyǵa arnalǵan arnaıy kórme. Monotuqymdy kórmege 30-dan astam tazy qatysyp otyr. Bul tarıhı oqıǵa. Sebebi tazyny álemdik deńgeıde moıyndaǵanǵa deıin bizdiń ıtterimiz moıyndalmaǵan toptyń ishinde óner kórsetetin. Búgin ózine uqsas moıyndalǵa ıtterdiń arasynda saıysqa túsedi, — dedi Qazaqstan kınologtar odaǵynyń prezıdenti Baýyrjan Serikqalı.
QR Prezıdenti Іs basqarmasynyń ókili Qaısar Jumabaıuly aldaǵy 10 jylda tazylardyń sanyn kóbeıtý jáne halyqaralyq arenada tanytý boıynsha jumystar júrgiziletinin atap ótti.
— Prezıdentimizdiń tapsyrmasymen sońǵy 2 jylda aıtarlyqtaı jumys atqaryldy. Halyqaralyq kınologııalyq federatsııa qazaq tazysyn resmı túrde ıt tuqymy dep aldyn ala taný týraly sheshim qabyldady Endi aldaǵy 10 jylda biraz eńbek etý kerek. Halyqaralyq kınologııalyq federatsııanyń talabyna sáıkes asyl tuqymdy tazylardyń sanyn kóbeıtý, halyqaralyq is-sharalarǵa jıi qatysyp, olardy elimizde ótkizý qajet. Sonda tolyqtaı moıyndalyp, álemge dárejege kóterilemiz dep senemin, — dedi Qaısar Jumabaıuly.
Halyqaralyq kórmege kóp jyldan beri tazy asyraýmen aınalysatyn otbasylar da qatysty. Olardyń biri — Ernar Mútekeevtiń otbasy. Itbeginiń aıtýynsha, jeti qazynanyń birine jatatyn janýardy ósirýmen aınalysqanyna 15 jyldan asqan. Ol osy jyldardyń ishinde qazaqy tazynyń adaldyǵy men aqyldylyǵyna tánti bolǵan.
— Osy Almatyda turamyz. Qazirgi ýaqytta eresek 12 tazy jáne 5 kúshigimiz bar. Tazynyń minezi jaqsy, adamǵa jaqyn, ıesine adal bolady. Ańshylyqqa jaralǵan ıt, óte jyldam keledi. Jetisine bir ret tazylarymyzben ańǵa shyǵyp turamyz, — dedi Ernar Mútekeev.
Kórmeniń taǵy bir qatysýshysy Merýert Esenova Aqsaýyt esimdi tazyny baptap júrgenine 2 jyl bolǵanyn aıtty. Onyń sózinshe, ıttiń bul tuqymyn jıi júgirtip turý qajet.
— 3 aılyq kezden ózim baǵyp kelemin. Aty — Aqsaýyt, jasy 2-de. Tazy basqa tuqymdarǵa qaraǵanda óte sabyrly, adamdy múldem qappaıdy jáne taza keledi. Ózi otyrǵan jerge dáret syndyrmaıdy. Endi tazy asyraýdyń bir ereksheligi — tazyny jylqy sekildi kúnde júgirtip turý kerek. 3-4 kún úıde otyryp qalsa, kúshi jınalyp qalady. Óıtkeni olarda energııa tolyp turady, — dedi ol.
Eske salaıyq, Halyqaralyq kınologııalyq federatsııanyń Bas komıteti qazaq tazysyn resmı túrde ıt tuqymy dep ádepki (aldyn ala) taný týraly sheshim qabyldady.