«Kóshpendiler álemi» halyqaralyq etnofestıvali ashyldy

  ASTANA. QazAqparat - Etnofestıvaldiń ashylý saltanaty 8 komandanyń - Vengrııa, Bolgarııa, Túrkııa, Ýkraına, Reseı (ıAkýtııa men Bashqurtstan), Qyrǵyzstan, Qazaqstan elderi ókilderiniń sherýimen bastaldy, dep habarlaıdy QazAqparat tilshisi.

Ashylý saltanatynda festıval qonaqtary: MagyarTuran (Vengrııa), Bolgarlyq «Baga-Týr» sport mektebi, «Lıýbızar-Soltústik Amýr» 1-shi Bashqurlyq atty polk» áskerı-patrıottyq klýby» (Bashqurstan), Ordogaı Túrik tarıhı jańǵyrý komandalary óz ónerlerin ortaǵa saldy.
   

Festıvaldiń saltanatty ashylýynda QR Mádenıet jáne sport mınıstrliginiń Jaýapty hatshysy Ýálı Qýatjanov sóz sóıledi. «Búgin qazaqta ejelden bar dástúrdiń jańǵyrý kúni. Barsha túrki baýyrlas elder bolyp kóshpendiler dástúrin halyqqa óner, qoıylym arqyly jetkizedi. Bul óz kezeginde Elbasynyń «Rýhanı jańǵyrý» baǵdarlamasynyń júzege asyrylýynyń kýási. Odan bólek elordamyzdyń 20 jyldyǵy qarsańynda Astanamyzda kóshpendiler dástúrin saqtaǵan ónerpazdardyń basyn qosý - qala kúnine oraı úlken syı», - dedi ol. 
 

Festıval aıasynda Astana qalasynyń turǵyndary men qala qonaqtary «Etnoaýyl» ulttyq-mádenı kesheninde túrki álemine saıahattap, Uly Dalanyń rýhyn sezine alady. Kóshpendilerdiń 3 tarıhı eposynyń qoıylymy ótedi.  

Birinshi eposta «Bagatýr» komandasy bolgarlyq batyrlardy qutqaryp qalǵan perızattar týraly ańyzdy sahnalasa, Túrik komandasy Osman qorǵanynyń tarıhyn jetkizýge tyrysady.

Óz kezeginde, qazaqstandyq top Medet pen Aısulýdyń mahabbat dastanyn kórsetedi. Ańyzdy sahnalaý kezinde «Teńge ilý», «Qyz qýý», «Aýdaryspaq» sııaqty ulttyq oıyndar kórsetiletin bolady.
   

Munyń syrtynda, bul jolǵy festıvalge halyqaralyq konkýrs laýreattary ıÝlıana Krıvoshapkına men TıýrgenKam qatysady.

Eki kún boıy 7 aýyldan turatyn festıvaldiń qatysýshylary kóshpendiler mádenıetin jetik meńgergen jaýjúrek sarbazdar, mergender, at qulaǵynda oınaıtyn shabandozdar jáne mýzykanttar san túrli qoıylymdar qoıyp, sheberligimen kórermendi tánti etpek.