Kóshi-qon saıasatynyń jańa tujyrymdamasy ázirlenedi
«El ekonomıkasyn bilikti kadrlarmen qamtamasyz etý maqsatynda mınıstrlik zań jobasyn ázirleıdi jáne ol biliktilik pen daǵdylardy tanýǵa, biliktiliktiń sáıkestigin baǵalaýdy úılestirýge tıis. Sondaı-aq Biliktilik jónindegi ulttyq organ qurýǵa baǵyttalady. Jańa zań biliktilikti taný júıesiniń biryńǵaı talaptaryn birizdendirýdi jáne belgileýdi, sondaı-aq mamandyqtarǵa qol jetkizýdi retteý tásilderin bekitýdi qamtamasyz etedi», - dedi mınıstr.
Osy rette ol Prezıdent kóshi-qon protsesteriniń eńbek naryǵyna kóp áser etetindigin atap ótkendigin aıtty.
«Osyǵan oraı kóshi-qon saıasatynyń jańa tujyrymdamasyn ázirleý tapsyryldy. 5 jylǵa arnalǵan tujyrymdama ázirlenetin bolady. Onda ońtústikten soltústikke óńiraralyq ishki utqyrlyqty arttyrýǵa qolaıly jaǵdaılardy qamtamasyz etý; shetelde jumys isteıtin qazaqstandyq azamattardyń eńbek jáne áleýmettik quqyqtaryn qorǵaý tetigin qurý; sondaı-aq qandastardyń turaqty turýǵa Qazaqstanǵa qonys aýdarýǵa jaǵdaı jasaý; sheteldik mamandardy tartý boıynsha retteletin jáne ıkemdi júıeni qamtamasyz etý qarastyrylatyn bolady», – dedi Serik Shápkenov.
Onyń atap ótýinshe, jańa tujyrymdama aıasynda ońtústikten soltústikke qonys aýdarǵan azamattarǵa járdemaqy bólýdiń qoldanystaǵy tetigi qaıta qaralady. Ońtústik óńirlerden jumyskerlerdi óz betinshe jaldaıtyn jáne jumysqa ornalastyratyn jumys berýshiler úshin memlekettik qoldaý alý tetigi ońaılatylyp, keńeıtiledi.
«Bul olardy qonys aýdarý baǵdarlamalaryna belsendi qatysýǵa yntalandyrady», - dedi ol.