Kósherbaev pen Áıtimovaǵa «BQO-nyń qurmetti azamaty» ataǵy berildi

ORAL. QazAqparat - Búgin BQO máslıhatynyń 17-sessııasy bolyp, onda Qyrymbek Kósherbaev pen Birǵanym Áıtimovaǵa «BQO-nyń qurmetti azamaty» ataǵyn berý týraly usynys qoldaý tapty, dep habarlaıdy QazAqparat tilshisi.

Sessııaǵa qatysqan oblys ákimi Altaı Kólginov memleket jáne qoǵam qaıratkerleri Qyrymbek Kósherbaev pen Birǵanym Áıtimovanyń elimizge, Batys Qazaqstannyń damýyna sińirgen eńbegin atap kórsetti.
Qyrymbek Eleýuly 2000-2003 jyldary Batys Qazaqstan oblysyna basshylyq etip, óńirdi túletý, Elbasy tapsyrmasyna sáıkes qolǵa alynǵan memlekettik baǵdarlamalardy júzege asyrý baǵytynda kóptegen jumystardy atqardy. 2013 jyldan beri Qyzylorda oblysyn basqaryp keledi.
Batys Qazaqstan oblysynda dúnıege kelip, osynda eńbek jolyn bastaǵan Birǵanym Saryqyzynyń da qaıratkerlik qyry kópke málim. Elde basshylyq qyzmetterde bolýmen birge Qazaqstan Respýblıkasynyń BUU janyndaǵy turaqty ókili qyzmetin atqardy. Qazir Senat depýtaty.
Sessııada sondaı-aq QR Úkimeti janyndaǵy respýblıkalyq onomastıka komıssııasynyń oń qorytyndysy negizinde 5-shaǵynaýdandaǵy jańa alańǵa Qazaqstan Respýblıkasynyń tuńǵysh Prezıdenti ataýy, atalmysh shaǵynaýdanǵa aqyn, Qazaqstannyń halyq jazýshysy, Memlekettik syılyqtyń ıegeri Qadyr Myrza Álıdiń esimi berildi. Oǵan qosa Derkól aýylyndaǵy shaǵynaýdandar «Kókjıek», «Saryarqa», qaladaǵy jóndeý zaýyty aýdanyndaǵy skver «Chernobyl apatynyń saldaryn joıýshylar» ataýyn aldy. Oraldaǵy 83 kóshege jańa ataý berildi. Aqjaıyq aýdanyndaǵy Pervomaı aýylyn - Qabyrshaqty, Syrymdaǵy Birinshi Maıdy Saraljyn dep ataý jóninde de sheshim qabyldandy.