Kóshe jabylsa, sý keledi dep túsiný qate: Astana ákimdigi turǵyndardy sabyrǵa shaqyrdy
«Qurmetti dostar! Qala turǵyndary! Osy aıdyń sońyna deıin aýyz sý tapshylyǵy qalada sheshiledi. Degenmen, dál qazirgi ýaqytta keıbir turǵyn úılerde sýdyń azdyǵy shamadan tys qatty baıqalyp jatqanyn túsinip otyrmyz. Bundaı úılerdiń máselesin «Astana Sý Arnasy» jáne aýdandyq ákimdikter birlesip sheshýde. Keıbir jerlerde úıdiń nasostary qaıta bekitilip, sonyń arqasynda sýdyń aǵysy kúsheıtilip jatyr. Biraq ol barlyq jaǵdaıda birdeı kómektese bermeıdi.
Degenmen, «Astana Sý arnasy» barlyq turǵyn úılerge teńdeı qarap, sý tapshylyǵyn sheshýge tyrysýda. Biraq, ókinishke qaraı, sý qoımalarynda sý deńgeıi qatty tómendep ketken kezde, olar sýdy toltyryp alǵansha qaladaǵy aǵysty azaıtýǵa májbúr. Ádette bul túnnen tańǵa deıin jalǵasady. Bundaı kezde sabyrdan basqa eshteńe kómektese almaıtyny taǵy anyq.
Sol sebepti qalyptasqan jaǵdaıǵa túsinýshilikpen qarap, zańǵa qaıshy áreketterden aýlaq bolýǵa shaqyramyz. Kóshe jabylsa, sý keledi eken dep túsiný qate. Esesine, zańǵa qaıshy áreket, basqa azamattardyń erkine nuqsan keltirip, jol-kólik apatyna ákelýi yqtımal. Sol sebepti, qalyptasqan jaǵdaıda ózge turǵyndar sekildi zań aıasynda birlesip jumys jasaýǵa shaqyramyz. Árbir aryz-shaǵym tolyq qaralady, mamandar sizge mindetti túrde kómektesedi», - delingen Astana qalasy Іshki saıasat basqarmasynyń basshysy Dáýren Babamuratovtyń vıdeoúndeýinde.
Ákimdikten eske salyp ótkendeı, sý tapshylyǵy 2021 jyly qurylysy bastalǵan sý tazalaý stantsııasy iske qosylǵan kezde, ıaǵnı 30 maýsymnan keıin tolyqqandy sheshiledi.
«Sonymen qatar kelesi aptada Astana sý qoımasynan taǵy bir qubyr sý stantsııasyna jiberiledi. Bul da sý tapshylyǵynyń sheshilýine kómektesedi», - dedi Dáýren Babamuratov.
Eske salaıyq, búgin Memleket basshysy Qasym-Jomart Toqaev elordany sýmen qamtamasyz etý týraly qala ákimi Jeńis Qasymbektiń baıandamasyn tyńdady.Keshe Jeńis Qasymbek te Astana turǵyndaryna vıdeoúndeý jasap, sý tapshylyǵy máselesi jýyq arada sheshiletinine ýáde bergen edi.