Kóshe ónerpazdary qaıyrshylar emes - 80 jastaǵy saksafonshy

<p>Almatynyń Arbaty ónerpazdardyń úlken sahnasyna aınalǵan. Kóshede óner kórsetetinderdiń arasynda mýzykalyq bilimi bary da, joǵy da kezdesedi. Solardyń eń úlkeni &ndash; Amangeldi Qumyqbaev. Sekseniń seńgirine shyqqan almatylyq qarııamen Kazinform tilshisi áńgimelesip qaıtty.</p>

– Amansyz ba, ata? 10 kúndeı boldy Arbatta saksafonnyń syrly úni estilmeı qaldy, syrqattanyp qalǵan joqsyz ba?

– Qalym jaqsy, qalqam, durys baıqapsyń Arbatqa kelmegenme eki apta boldy. Áýlettiń úlkeni, qarııasy bolǵandyqtan qurmettep shaqyratyn jer kóp. Oǵan barmasań taǵy bolmaıdy. Elge baryp qaıttym.Men Tarazdyń týmasymyn. 1982 jyly Talǵarǵa kóship kelgenbiz.

– Kóshe ónerpazdarynyń arasynda týma talanttar kóp. Sizdiń mýzykalyq bilimińiz bar ma?

– Mýzykalyq bilimim bar. 1964 jyly Shymkent qalasynda ornalasqan mýzykalyq ýchelışeniń úrmeli aspaptar klasyn támamdadym. Ońtústik Qazaqstanda, Tarazda teatrda jumys istedim. Ómir boıy osy óner salasynda eńbek etken adammyn.

Adam óte jaqsy estý qabiletimen mýzykalyq aspaptarda notasyz oınaýdy úırene alady. Qarapaıym akkordtardy tańdap úırený ánge súıemeldeý tabý úshin jetkilikti bolýy múmkin. Biraq kúrdeli mýzykalyq shyǵarmalardy oryndaý úshin notalardy bilý qajet. Ózim 14 jasymnan beri saksofonymdy qolymnan túsirgen emespin. Jalpy, úrmeli aspaptyń kez kelgeninde oınaı alamyn.

– Keıbir adamdar kóshe mýzykanttaryna nápaqa tabý úshin amaldap júrgen jandar dep qaraıdy...

– Arbattaǵy kóshe ónerpazdaryn jaǵdaıy tómen nemese qaıyrshy dep qabyldaý qate pikir. Men túrli sahnada óner kórsettim, ártúrli kontsertterim boldy, biraq kósheniń orny bólek eken. Ony osy qartaıǵan shaǵymda túsindim. Úıde tórt qabyrǵaǵa qarap otyrǵym kelmeıdi. Qala turǵyndary men qonaqtarynyń kóńilin kóterip, oǵan qosa azyn-aýlaq tabys taýyp júrgenim ras. Biraq, aqsha meni qyzyqtyrmaıdy. Shúkir, zeınetaqy alyp otyrmyn, sol da jetedi. Tyńdaýshylarymnyń qoshemetinen shabyt alamyn. Udaıy halyq aldynda bolý – bizdiń talantymyzdy shyńdaı túsedi. Maǵan elmen sóılesip, aralasyp otyrǵan unaıdy. Almaty – ásem qala. Ortalyǵy tipten keremet. Osy Arbatqa kelip sergip qalamyn.

– Repertýaryńyzda qansha mýzykalyq kompozıtsııa bar?

- Repertýarymda myńǵa tarta mýzykalyq kompozıtsııa bar. Kóbine retro ánderin oryndaımyn. Bas kezinde Arbatta óner kórsetý yńǵaısyz sııaqty bolyp kóringen. Keıinnen boıym úırenip ketti. Jańa atap ótkenimdeı, súıikti isimnen qýat alamyn. Zamandastarym arqamnan qaǵyp qoıady, jastar jaǵy saksafonnyń ereksheligi týraly aıtyp berýimdi suraıdy, óziń sııaqty menimen suhbattasqysy keletinder bar. Mine, osynyń bári meniń kóńil kúıimdi kóteredi.

– Otbasyńyz, balalaryńyz týraly aıtyp berińizshi...

– Eki ul, bir qyzym bar. Kempirim ekeýmiz solardan taraǵan nemere, shóbereniń qyzyǵyn qyzyqtap, rahatyna bólenip otyrǵan baqytty ata-ájemiz. Arbatta tapqan tabysyma sol kishkentaılarǵa táttiler satyp alamyn. Osynyń ózi zor baqyt. Apalaryń shahmatty keremet oınaıdy. Osy kúnge deıin jeńip kórgen emespin.

– Emen-jarqyn áńgimeńizge rahmet!