Qoshanov UQShU PA-ny Qazaqstannyń Bıologııalyq qaýipsizdik agenttigin qurý bastamasyn qoldaýǵa shaqyrdy

ASTANA. QazAqparat – Májilis tóraǵasy Erlan Qoshanov bastaǵan delegatsııa Mınskide ótken Ujymdyq qaýipsizdik týraly shart uıymy Parlamenttik Assambleıasy Keńesiniń kezekti otyrysyna qatysty. QazAqparat bul týraly Májilistiń baspasóz qyzmetine silteme jasap habarlaıdy.

Erlan Qoshanov Qazaqstanda júrgizilip jatqan saıası reformalar men Májilis saılaýynyń qorytyndylary týraly málimet berdi. Ol UQShU Parlamenttik Assambleıasynyń monıtorıngtik mıssııasy quramynda saılaýdy baqylaýǵa óz ókilderin jibergeni úshin qatysýshy elder parlamentterindegi áriptesterine rızashylyǵyn bildirdi.

Májilis spıkeri UQShU Parlamenttik Assambleıasy ózin óńirlik jáne halyqaralyq sıpattaǵy ózekti máseleler talqylanatyn, modeldik zańdar ázirlenetin tıimdi parlamentaralyq dıalog alańy retinde kórsete alǵanyn atap ótti. Erlan Qoshanov Keńes otyrysyna qatysýshylardyń nazaryn óńirdegi bıologııalyq qaýipsizdikti qamtamasyz etý máselesine aýdardy.

«Qazaqstan Prezıdenti Qasym-Jomart Toqaev BUU sheńberinde Bıologııalyq qaýipsizdik jónindegi halyqaralyq agenttik qurý týraly bastama kótergeni belgili. Osy baǵytta biraz jumys atqarylýda. Bizdiń bastamamyz halyqaralyq qoǵamdastyq, sonyń ishinde Ujymdyq qaýipsizdik týraly shart uıymyndaǵy áriptesterimiz tarapynan qoldaý tabatynyna senimdimin», – dedi Erlan Qoshanov.

Delegatsııa basshylary Belarýs Respýblıkasynyń Prezıdenti Aleksandr Lýkashenkomen kezdesti.

Sondaı-aq sapar aıasynda birqatar ekijaqty kezdesý ótti.

Belarýs Respýblıkasy Ulttyq jınalysy Ókilder palatasynyń tóraǵasy Vladımır Andreıchenkomen júzdesýde Májilis spıkeri parlamentaralyq ózara is-áreket Qazaqstan-Belarýs qarym-qatynasynyń mańyzdy baǵyty ekenin atap ótti.

«Bizdiń parlamentterimiz eki el basshylarynyń ýaǵdalastyqtaryn belsendi iske asyrýǵa atsalysýy kerek. Biz Parlamentaralyq odaq, TMD Parlamentaralyq Assambleıasy, UQShU, Eýropadaǵy qaýipsizdik jáne yntymaqtastyq jónindegi uıymnyń Parlamenttik assambleıalary aıasyndaǵy ózara is-áreketimizdi odan ári nyǵaıtýǵa nıettimiz», – dedi Erlan Qoshanov.

Sonymen qatar Májilis tóraǵasy UQShU PA Keńesi alańynda Tájikstan Respýblıkasy Parlamentiniń tóraǵasy Mahmadtoır Zokırzodamen jáne Qyrǵyz Respýblıkasy Jogorký Kenesh spıkeri Nurlanbek Shakıevpen kezdesti.