Qoshanov: Prezıdenttiń reformalary men partııanyń jobalary aýyldyń damýyna jańa serpin berdi
Palata spıkeri saparyn Saıram aýdanyndaǵy sút ónimderin óndiretin kásiporyn «AYKAN» jaýapkershiligi shekteýli seriktestigin aralaýdan bastady. Munda «Aýyl amanaty» partııalyq jobasyna atsalysqan sharýa qojalyqtary basshylarynyń qatysýymen baǵdarlamanyń iske asyrylý barysy talqylandy. Atalǵan joba aýyl-aımaqta kásipkerlikti qoldaýǵa baǵyttalǵan.
– «Aýyl amanaty» jobasy – aýyl azamattary úshin tabysyn arttyrýǵa zor múmkindik. Bul, ásirese, turǵyndarynyń kóbi aýylda turatyn Túrkistan oblysy sııaqty halqy tyǵyz óńir úshin ózekti. Bıyl osy baǵdarlama boıynsha bólinetin barlyq qarajattyń besten bir bóligi dál osynda baǵyttalady. Bul – shamamen 20 mıllıard teńge. 3,5 myńǵa jýyq adamǵa jańa jumys oryndary ashylady, – dedi Erlan Qoshanov.
Oblysta «Aýyl amanaty» jobasyn iske asyrý qorytyndysy boıynsha oǵan qatysýshylardyń ortasha aılyq tabysyn 1,5 ese, sút ónimderin óndirýdi 40,6 paıyzǵa, etti 63,2 paıyzǵa, jylyjaı ónimderin 30 paıyzǵa ulǵaıtý josparlanǵan. Jalpy bıyl joba aıasynda elimiz boıynsha 17 myń adamdy qamtý kózdelip otyr.
Sondaı-aq Erlan Qoshanov «Qaryzsyz qoǵam» jobasyna qatysýshylarmen kezdesti. Joba qarjylyq saýattylyqty arttyryp, qarjyny durys jumsaýǵa úıretedi. Jobany óńir turǵyndary joǵary baǵalap otyr. Májilis tóraǵasynyń aıtýynsha, qazir elimizde 7,5 mln adamnyń, ıaǵnı halyqtyń úshten bir bóliginiń bankte qaryzy bar. Shamamen 1,5 mıllıon azamat nesıesin 90 nemese odan da kóp kúnge keshiktirip tóleýde jáne bankrottyq kúı keshýde. Búginde bul másele memleket deńgeıinde kóterildi.
– Ondaı adamdar qaıda baryp, kimnen kómek suraıtynyn da bilmeıdi. Aınalyp kelgende, barlyǵy qarjylyq saýatsyzdyqqa kelip tireledi. Sondyqtan «AMANAT» partııasy «Qaryzsyz qoǵam» jobasyn qolǵa alyp otyr. Eki aıda elimizdiń birqatar óńirinde 20 myńnan astam adam oqytyldy. Jyl sońyna deıin bul kórsetkish búkil el boıynsha 80 myńǵa jetkiziledi. Trenerler halyqqa qarjyny durys ıgerýdi, otbasylyq bıýdjetti josparlaýdy, nesıeni durys alýdy úıretedi,– dedi Májilis tóraǵasy.
Jalpy Palata spıkeri Prezıdenttiń saıasaty men «AMANAT» partııasynyń jobalary arqasynda búginde aýyldaǵy belsendi azamattar úshin jańa ári úlken múmkindikterge jol ashylǵanyn atap ótti.
– Partııanyń jobalary halyqqa zań sheńberinde qaryzdan qutylýǵa, qarjylyq saýattylyqty úırenýge, óz isin júrgizý úshin memleketten tıimdi nesıe alýǵa kómektesedi. Sonymen qatar biraz aýyl sharýashylyǵy jerleri memleketke qaıtarylyp jatyr. Olar da halyqtyń ıgiligine beriledi. Endigi kezekte eń bastysy – belsendilik tanytyp, osy múmkindikterdi paıdalaný. Bizdiń mindetimiz – halyqqa balyq emes, qarmaq berý. Adamdardyń ózin-ózi damytýyna múmkindikter jasasaq, sonda jumys istep, ózderin laıyqty túrde qamtamasyz ete alady, – dedi Májilis tóraǵasy.
Qazyǵurt aýdany, Sharbulaq aýylyndaǵy Danııar Qarataevtyń sharýashylyǵy – osynyń aıqyn dáleli. Erlan Qoshanov bul sharýashylyqqa da at basyn burdy. Qaryzy kóp, turaqty jumys orny joq aýyl turǵyny «Qaryzsyz qoǵam» jobasy boıynsha oqyp, keıin «Aýyl amanaty» jobasymen 4 mln teńge nesıe alǵan. 8 saýyn sıyr satyp alyp, sút óndirisin jolǵa qoıyp otyr. Qazir Danııar Qarataevtyń turaqty tabysy bar.
Sonymen qatar Májilis spıkeri Saıram aýdany Aqsýkent aýylyndaǵy 1200 oqýshyǵa arnalǵan «Ál-Farabı» atyndaǵy mektepke bardy. Bul bilim ordasyn 2022 jyly óńirge belgili metsenat, partııa ardageri Nızamhan Sýlaımanov jeke qarajatyna salyp berdi. Metsenat óz aýdanynda osyndaı 7 mektep saldyrǵan.
– Túrkistanda ótken sońǵy Quryltaıda Prezıdentimiz jaýapty azamatsyz Ádiletti Qazaqstandy qurý múmkin emes ekenin aıtty. Bul adam el ıgiligi jolynda adal eńbek etip, týǵan jerdiń damýy úshin baryn salyp júr. Ol óziniń naǵyz patrıot ekenin sózimen emes, isimen dádeldedi. Saıram óńiriniń kásipkerleri – osy jaýapty azamattyń jarqyn úlgisi, – dedi Májilis Tóraǵasy.
Erlan Qoshanov Qutarys aýylyndaǵy tolyqtaı jeke qarajatqa salynǵan jańa sport kesheninde de boldy. Ol partııa múshelerine bıznestiń áleýmettik jaýapkershiliginiń osyndaı úlgilerin respýblıka deńgeıinde kóbirek nasıhattaýdy tapsyrdy.
Sondaı-aq óńirde Májilis spıkeri «Jer amanaty» jáne «Quqyqtyq kómek» partııalyq jobalarynyń júzege asyrylý barysymen tanysyp, halyqtyń usynystaryn tyńdady. «Qaryzsyz qoǵam» jobasynyń birqatar qatysýshysy «AMANAT» partııasynyń qataryna qosyldy. Jańa múshelerdiń aıtýynsha, olardyń kelýine partııanyń qarapaıym halyqqa sózben emes, naqty is júzinde kómektesetini sebep bolǵan.