Kóshi-qon zańnamasyn buzǵan sheteldikter elden kúshtep shyǵaryldy

<p>ASTANA. KAZINFORM &ndash; Elimizde &laquo;Mıgrant&raquo; operatsııasy aıasynda kóshi-qon erejelerin buzyp, sot sheshiminen jaltaryp júrgen sheteldikterdi anyqtaý jumystary júrgizilip jatyr.</p>

QR ІІM-niń málimetinshe, is-sharanyń úsh kúninde kóshi-qon zańnamasyn buzýshylardy el aýmaǵynan shyǵarý týraly 504 sot sheshimi shyǵarylǵan. Tártipke baǵynbaǵan 62 sheteldikti el aýmaǵynan kúshtep shyǵarýǵa týra kelgen. Olarǵa bes jylǵa deıin Qazaqstanǵa kirýge tyıym salyndy.

«Polıtseıler Almaty ákimdiginiń kómegimen afrıkalyq jeti turǵyndy elden kúshtep shyǵardy. Olar elimizdiń kóshi-qon zańnamasyn buzyp, belgilengen merzimde Qazaqstannan shyqpaı, sot sheshimimen ákimshilik jaýapkershilikke tartyldy. Qazaqstan Respýblıkasynyń shekarasynan shyǵaryp jiberý túrindegi ákimshilik jaza qoldandy», - delingen ІІM habarlamasynda.

Sheteldikterdi elge shaqyrǵan uıymdar da polıtsııa tarapynan ákimshilik jaýapkershilikke tartylyp, olarǵa 90 myń teńge kóleminde aıyppul salyndy. Sondaı-aq, jumys berýshi uıymdar deportatsııaǵa jumsalǵan shyǵyndy óteýi tıis.

Kóshi-qon qyzmeti elge sheteldikterdi shaqyratyn qazaqstandyqtarǵa olardyń elden ýaqytyly shyǵýyn uıymdastyrý qajet ekenin eske salady.