«Qosh bol, Kanvon!»: Olımpıadanyń jabylý saltanaty ótti
Youth Olympic Park sport kesheninde uıymdastyrylǵan is-sharada elimizdiń kók Týyn Berik Boranbaev pen Mereı Tastemir ustap shyqty.
Esterińizge sala ketsek, Olımpıadanyń ashylý saltanatynda Qazaqstan týyn konkımen júgirýden ulttyq quramanyń múshesi Krıstına Shýmekova men short-trekshi Erasyl Shyńǵyshan alyp shyqqan bolatyn.
Kanvon Olımpıadasynda qazaqstandyq sportshylar 1 altyn, 2 qola medal jeńip alyp, jalpykomandalyq esepte 20-orynǵa taban tiredi.
Olımpıada oıyndarynda Qazaqstan jasóspirimder quramasy sapynda 41 sportshy 5 sport túrinen baq synap, 55 júlde jıyntyǵyn sarapqa saldy. Atap aıtar bolsaq, bıatlon, kerlıng, konkımen júgirý, short-trek, shaıbaly hokkeı, shańǵy jarysy, shańǵymen tuǵyrdan sekirý, shańǵy qossaıysy, taý shańǵysy, frıstaıldan paralleldi mogýl boıynsha synǵa tústi.
Atalǵan jarysqa álemniń 80-ge jýyq elinen 1 800 sportshy qatysyp, júldeli oryndarǵa talasty. Jalpy sporttyq dodada 7 sport túrinen (15 dıstsıplına) 81 medal jıyntyǵy sarapqa salyndy.
«Kanvonda alaýy tutanǵan Jasóspirimderdiń qysqy Olımpıadasy óz máresine jetti. Qazaqstan quramasynyń jas atletteri Koreıa jerindegi baıraqty básekede el namysyn abyroımen qorǵap, jankúıerlerdi júldelermen qýantty. Ulttyq quramanyń bolashaq izbasarlary Kanvonda 1 altyn, 2 qola medal oljalap, Jasóspirimder Olımpıadasynda buryn-sońdy bolmaǵan tarıhı nátıje kórsetti. Osyndaı tamasha jetistikke qol jetkizgen jas atletterimizdi Olımpıadany sátti aıaqtaýymen shyn júrekten quttyqtaımyn. Barlyq sportshymyz aldaǵy ýaqytta ózderine qajet bolatyn qundy tájirıbe jınap qaıtty», - dedi Ermek Marjyqpaev.
Táýelsizdik jyldarynda Qazaqstan sportshylary úsh qysqy Jasóspirimder Olımpıadasyna qatysyp, 5 medal jeńip alǵan bolatyn. 2012 jylǵy Insbrýktegi (Aýstrııa) Olımpıadada otandastarymyz 1 kúmis, 2 qola oljalasa, Lıllehammerde (Norvegııa) eki qolamen shektelgen edi. Osydan 4 jyl buryn Lozannada (Shveıtsarııa) ótken oıyndarda ókinishke qaraı, qurama qorjyny bos qaıtqan edi.