Qosarlanǵan tólem, jabdyqty saǵattyq jaldaý jáne lıtsenzııasyz jumys: MÁMS-ke memlekettik aýdıt jasaldy
Osy salaǵa júrgizilgen ekinshi aýdıt 3,8 trln teńge bolatyn qarajat pen aktıvterdi qamtydy. Tekserý sharalary 13 uıymǵa qatysty júrgizildi.
Búgingi tańda mindetti áleýmettik medıtsınalyq saqtandyrý júıesine (MÁMS) 16,2 mln adam kiredi. Bul rette 12 mln adam jarnalaryn memleket tóleıtin jeńildikti sanattarǵa jatady. Oǵan qosa 2 mln jýyq memlekettik qyzmetshi, bıýdjettik uıymdar men kvazımemlekettik sektor qyzmetkerleri bar. Nátıjesinde jeke shyǵystardy (aqyly medıtsınany) eseptemegende memleketke túsetin qarjylyq júkteme kem degende 76%-dy quraıdy. Osyǵan baılanysty aýdıttiń negizgi qorytyndylarynyń biri – MÁMS engizilgenine qaramastan, azamattardyń ortaq jaýapkershiligi esebinen memleketke túsetin júkteme áli de aıtarlyqtaı tómendegen joq.
Ulttyq qor qarajatynyń sozylmaly ıgerilmeýi oryn alyp otyr. Aýdıt júrgiziletin kezeńde kepildendirilgen jáne nysanaly transfertter sheńberinde 50 mlrd teńgeden astam qarjy bólingen. Alaıda 13 mlrd teńge nemese 26%-y ıgerilmegen.
Qor medıtsınalyq qyzmetterdiń sapasyn baqylaýǵa tıisti nazar aýdarmaıdy. Máselen, Astana boıynsha MÁMS sheńberinde eki iri qyzmet kórsetýshige baqylaý tekserisi júrgizildi, olarǵa jıyntyǵynda 179 myń adam bekitilgen. Nátıjesinde olardyń jeke oryndary men medıtsınalyq jabdyqtardyń joqtyǵy, olardy saǵatyna jalǵa alatyny anyqtaldy. Bul qyzmet kórsetýshi JShS-lardyń birqatar klınıkasynda jekelegen qyzmet túrlerine lıtsenzııalary jáne ózdiginen qozǵala almaıtyn azamattardy qabyldaýǵa arnalǵan pandýstary joq.
Sonymen qatar aýdıt barysynda birlesip qyzmet kórsetýshiler tarapynan ÁMSQ esebinen jáne azamattardyń óz esebinen medıtsınalyq qyzmetterge qosarlanǵan aqy tóleý faktileri anyqtaldy. Negizinde qoldanystaǵy erejeler boıynsha medıtsınalyq mekemeler TMKKK jáne MÁMS jelisi boıynsha qarjylandyrylatyn medıtsınalyq kómek túrleri úshin aqy almaýǵa mindetteme alady. Sonymen statsıonarlyq kómek boıynsha kem degende 1,7 mlrd teńgege, ambýlatorııalyq kómek boıynsha 27,6 mlrd teńgege qosarlanǵan tólem faktileri anyqtaldy. Qor tarapynan bul baǵytta monıtorıng júrgizilmeıdi.
Stomatologııalyq klınıkalardyń qyzmetterine ÁMSQ-dan qosarlanǵan tólem jasalýy jeke buzýshylyq retinde anyqtaldy. Medıtsınalyq saqtandyrý tarıfine anestezııanyń quny engizilip qoıǵan, biraq stomatologııalar ol úshin qordan jalpy somasy 2,1 mlrd teńgege qosymsha aqy alǵan.
Sonymen qatar Densaýlyq saqtaý, Іshki ister jáne Ádilet mınıstrlikteriniń aqparattyq júıeleriniń derekterin salystyrý nátıjesinde shetelge turaqty turýǵa ketken azamattarǵa dári-dármekterdi resimdeý faktileri anyqtaldy.
Otyrys barysynda Álıhan Smaıylov ÁMSQ bıýdjet qarajatynyń maqsatqa saı paıdalanylýyna sapaly baqylaýdy qamtamasyz etýge mindetti ekenin atap ótti.
«Muny qolmen emes, avtomattandyrylǵan túrde jasaý kerek. Qordyń táýekelderdi basqarýdyń ózindik júıesi bolýy tıis, onyń negizinde kórsetiletin qyzmetterdiń sapasyna, óndiristik bazanyń, jabdyqtardyń, tıisti medıtsınalyq lıtsenzııalar men ruqsattardyń bolýyna monıtorıng júrgizý qajet», — dedi Joǵary aýdıtorlyq palata tóraǵasy.Jalpy aýdıt qorytyndysy boıynsha:
32 mlrd teńgeden astam rásimdik buzýshylyqtar;
31,1 mlrd teńgege qarajatty tıimsiz josparlaý jáne paıdalaný anyqtaldy.
Qarjylyq shyǵyndar men jiberip alǵan paıda somasy 11,8 mln teńgeni qurady.
Sondaı-aq 65 rásimdik buzýshylyq, 154 ózge de buzýshylyq jáne júıelik kemshilik anyqtaldy.
Medıtsınalyq qyzmetter men tirkeýlerge qosarlanǵan aqy tóleý faktileri boıynsha materıaldar quqyq qorǵaý organdaryna beriledi.