Qos eldiń qyran tulǵasy: Rahmetolla Raıymqulovqa 110 jyl
Ózbekstannyń Tashkent oblysynda dúnıege kelgen kórnekti jazýshy, prozaık, dramatýrg aýdarmashy, qoǵam qaıratkeri, maıdanger Rahmetolla Raıymqulovtyń 110 jyldyǵyna arnalǵan birqatar is-shara uıymdastyryldy. Atap aıtqanda, «Qos eldiń qyran tulǵasy» atty ǵylymı-praktıkalyq konferentsııa ótip, halyqaralyq baıqaý jeńimpazdary marapattaldy.
Atalǵan saltanatty is-sharaǵa Qazaqstan Respýblıkasynyń Prezıdenti Qasym-Jomart Toqaev arnaıy quttyqtaý hatyn jiberip, ony Memleket basshysynyń keńesshisi Málik Otarbaev oqyp berdi.
«Rahmetolla Raıymqulov – rýhanııatymyzdyń órkendeýine zor úles qosqan qabyrǵaly qalamger. Jazýshynyń shoqtyǵy bıik shyǵarmalary oqyrman qaýymnyń júregine jol taýyp, laıyqty baǵasyn aldy. Sondaı-aq, ol sheteldiń klassıkalyq týyndylaryn qazaq tiline aýdaryp, rýhanı mol mura qaldyrdy», - dep jazylǵan quttyqtaý hatta.
Tashkent qalasyndaǵy Ózbekstan jazýshylar odaǵy ǵımaratynda ótken sharaǵa QR SІM qarasty «Otandastar qorynyń» prezıdenti Abzal Saparbekuly da qatysty. Ol Rahmetolla Raıymqulov baýyrlas qos elge ortaq shoqtyǵy bıik qalamger ekenine basa nazar aýdaryp, onyń aty men murasyn óshirmeı, jańǵyrtyp otyrǵan Ózbekstandaǵy qazaq qaýymyna tereń rızashylyǵyn bildirdi. A. Saparbekuly shettegi qazaqtarǵa degen memleketimizdiń qamqorlyǵy jáne osy rettegi «Otandastar qorynyń» jobalary týraly qysqasha baıandap ótti.
Іs-sharaǵa Qazaqstannyń Ózbekstandaǵy Elshisi B. Atamqulov pen eki eldiń zııaly qaýym ókilderi, R. Raıymqulovtyń qyzy – belgili memleket jáne qoǵam qaıratkeri Aqtoty Raıymqulova, sondaı etnıkalyq qazaqtardyń belsendileri men jastar qatysty.
Aıta ketsek, QR SІM jáne oǵan qarasty «Otandastar qory» R. Raıymqulovtyń urpaqtarymen birge 13 jas pen 35 jasqa deıingi sheteldegi qandastar arasyndaǵy talapty jastarǵa arnalǵan «Qos eldiń qyran tulǵasy» atty halyqaralyq shyǵarmashylyq baıqaýyn jarııalaǵan bolatyn. Baıqaý nátıjesi boıynsha alǵashqy úsh júldeli oryndy alǵan Mońǵolııa jáne Ózbekstannyń etnıkalyq qazaq jastary qarjylaı syılyqtarmen marapattaldy. Óz kezeginde, «Otandastar qory» júldeli oryn alǵan 6 qazaq balasyna aldaǵy shilde aıynda Býrabaıda ótetin jazǵy lagerge tegin joldama berdi.