Kortejde kóliktiń terezesi men lıýginen shyǵyp, ereje buzǵandarǵa 34 myń teńge aıyppul salynbaq

ASTANA. QazAqparat – Mektep bitirý keshteri men úılený toılaryndaǵy kortej kezinde kólik terezesi men lıýkterinen shyǵyp, jol erejesin buzatyndarǵa 10 AEK aıyppul salynýy múmkin. Bul týraly Ádilet mınıstrligi ashyq talqyǵa shyǵarǵan «QR Ákimshilik quqyq buzýshylyq týraly kodeksine ózgerister men tolyqtyrýlar engizý týraly» Zań jobasynda jazylǵan, dep habarlaıdy QazAqparat tilshisi.

«Jolaýshylardy kólik quralynyń kabınasynan tys tasymaldaý, sol sııaqty olardy kólik quralynyń terezesi men lıýkterine shyǵarýǵa jol berý, esikterdi ashý, sondaı-aq qozǵalys kezinde osyndaı basqa da áreketter jasaý 10 aılyq eseptik kórsetkish (34 500 teńge) mólsherinde aıyppul salýǵa ákep soǵady. Qozǵalys kezinde jolaýshylar kólik quralynyń salonynan tys jerde bolǵan kezde talapty saqtamaý 10 AEK mólsherinde aıyppul salýmen jazalanady», - dep kórsetilgen jańa qujatta.

Mundaı ózgeris mektep bitirý keshteri men úılený toılaryndaǵy kortej kezinde adamdardyń kólik terezesi men lıýkterinen shyǵý oqıǵalarynyń aldyn alý maqsatynda engizilip otyr.

«Qazirgi ýaqytta túlekterdiń mekteppen qoshtasý keshterin nemese úılený toılaryn ótkizý kezinde kortejderdiń qozǵalysy kezinde jolaýshylar kólik quralynyń lıýkterinen nemese tereze sańylaýlarynan shyǵyp, osylaısha olardyń qaýipsizdigine nemese tipti ómirine qaýip tóndiretin jaǵdaılar jıilep ketti. Qaıǵyly saldarǵa jol bermeý maqsatynda olardyń bastalýyn kútpesten, jolaýshylar tarapynan mundaı is-áreketterge jol bergeni úshin jeke biliktilik belgisin bólý, sondaı-aq jolaýshylardyń ózderi úshin jeke jaýapkershilik kózdeý usynylady. Bul tásil túrli jaǵymsyz saldardyń paıda bolý qaýpin joıady», - dep Ádilet mınıstrligi túsinikteme bergen ózgeriske.

Qujatty ashyq talqylaý 13 naýryzǵa deıin jalǵasady.