Kórshisiniń aýlasynan 3 qoı urlaǵan atyraýlyq 5 jylǵa sottaldy

<p>ATYRAÝ. KAZINFORM &mdash; Atyraý oblysynyń turǵyny kórshisiniń aýlasynan 3 qoıdy urlap ketken. Sot úkimimen kúdikti 5 jylǵa bas bostandyǵynan aıyryldy. &nbsp;&nbsp;</p>

Jylyoı aýdandyq sotynda mal urlaǵan kúdiktige qatysty qylmystyq is qaraldy. Sottalýshyǵa QR Qylmystyq kodeksiniń 188-1-babynyń 3-bóliginiń 2-tarmaǵymen aıyp taǵylǵan.

«Aýdandyq sottyń talqylaýy kezinde Qulsary qalasynyń turǵyny K.-nyń 2023 jylǵy 7 jeltoqsanda kórshisiniń qorshalǵan mal qorasynyń aýlasyna kirip, 3 qoıdy urlaǵany anyqtaldy. Ol urlanǵan maldy satyp, túsken aqshany spırttik ishimdik satyp alýǵa jumsaǵan. Sot jaza taǵaıyndaý barysynda K.-nyń buryn Jylyoı aýdandyq sotynyń 2020 jylǵy 2 naýryzdaǵy úkimimen QR Qylmystyq kodeksiniń 106-babynyń 1-bóligimen (Densaýlyqqa qasaqana aýyr zııan keltirý) aýyr qylmys jasaǵany úshin sottalǵanyn eskerdi. Qylmys jasalǵan kezde keltirilgen materıaldyq zalal ótelmegen», - dep habarlady sottyń baspasóz qyzmeti.

Jylyoı aýdandyq soty K.-ni kináli dep tanyp, 5 jyl merzimge bas bostandyǵynan aıyrý jazasyn taǵaıyndady. 

Sot úkimi zańdy kúshine engen joq.

Eske sala ketelik, budan buryn atyraýlyq jýrnalıst Vıktor Sýtıagınniń kóligin órtegen jigit 5 jylǵa sottalǵanyn habarlaǵan bolatynbyz.